الماتى قالاسىنىڭ قوعامدىق دامۋ باسقارماسى قۇقىق قورعاۋشىلارعا قالادا شەرۋ وتكىزۋگە تاعى رۇقسات بەرمەدى. بۇل جونىندە "ار.رۋح.حاق" قوعامدىق قورىنىڭ جەتەكشىسى، قۇقىق قورعاۋشى باقىتجان تورەعوجينا Facebook'تاعى پاراقشاسىندا حابارلادى دەپ جازدى ورتالىق ازيا جاڭالىقتار قىزمەتى.

باقىتجان تورەعوجينانىڭ ايتۋىنشا، اكىمدىكتەگىلەر ولارعا 11 جەلتوقساننىڭ ورنىنا 27 قاراشادا ميتينگ وتكىزۋدى ۇسىنعان. قۇقىق قورعاۋشىلار باس تارتقان. بۇعان دەيىن ولار شەرۋ وتكىزۋگە رۇقسات بەرمەگەن اكىمدىكتى سوتقا بەرگەن ەدى. العاشقى وتىرىس 17 قاراشادا ءوتۋى ءتيىس.

"يلليۋزياعا بەرىلمەيمىز، شەشىمدى سوتقا بەرىپ، قاۋلىسىن العاننان كەيىن بۇل ەلدە زاڭ دا، قيسىن دا، كونستيتۋتسيا دا، پرەزيدەنت ءسوزىنىڭ دە سالماعى جوق. ادام قۇقىعىن ەشكىم ساقتىعىسى كەلمەيدى" دەپ جازدى قۇقىق قورعاۋشى. ولار سوڭعى جاۋاپقا بايلانىستى دا سوتقا شاعىم تۇسىرەتىنىن ايتتى.

وسىمەن اكىمدىك ءبىر ايعا جۋىق ىشىندە قۇقىق قورعاۋشى باقىتجان تورەعوجينا مەن Liberty قورىنىڭ جەتەكشىسى عالىم اعەلەۋوۆكە شەرۋ وتكىزۋگە ەكىنشى رەت رۇقسات بەرمەي وتىر. ولار سوڭعى رەت 8 قاراشادا حات تاپسىرىپ، 11 جەلتوقساندا ماحاتما گاندي الاڭىنان باستاپ، شەۆچەنكو كوشەسىنىڭ بويىمەن ءجۇرىپ، شوقان ءۋاليحانوۆ الاڭىنا دەيىن 4 ساعات شەرۋ وتكىزەتىنىن حابارلاعان. ميتينگ تاقىرىبىن "بارلىعىنىڭ قۇقىقتارى مەن ەركىندىگى ساقتالسىن!", "ديسكريميناتسياعا جول جوق!" دەپ كورسەتكەن.

وسىعان ۇقساس جاعداي الدىندا دا قايتالانعان.

"بەلسەندىلەرەكسترەميستەمەس" (اكتيۆيستىنەەكسترەميستى) قۇقىق قورعاۋ توبىنىڭ مالىمەتىنشە, 2020 جىلدىڭ 30 شىلدەسىنەن بەرى قازاقستاندا 22 قالا مەن ەلدى مەكەندە بەيبىت جيىن وتكىزۋ تۋرالى 148 ءوتىنىش ورىندالماعان، 118-ءى بيىل تىركەلگەن.

قازاقستاندا بىلتىر "بەيبىت جيىن تۋرالى" جاڭا زاڭ قابىلدانعانمەن قۇقىق قورعاۋشىلار ازاماتتاردىڭ بەيبىت جيىن وتكىزۋ جانە جينالۋ قۇقىعى ءالى شەكتەلىپ وتىرعانىن سىنايدى. كوپ جاعدايدا ازاماتتاردىڭ بەيبىت شەرۋ وتكىزۋ تۋرالى وتىنىشتەرى ورىندالمايدى. بيلىك كوبىنە سول كۇنى وزگە شارا وتەتىنىن نەمەسە ءوتىنىشتىڭ قاجەتتى ەرەجەلەردى ساقتاي وتىرىپ جازىلماعانىن نەمەسە كارانتين شەكتەۋلەردى العا تارتادى. ال "رۇقسات ەتىلمەگەن" شاراعا كەلگەندەر ادەتتە ۇستالىپ، اكىمشىلىك جاۋاپقا تارتىلادى. حالىقارالىق قۇقىق قورعاۋ ۇيىمدارى قازاقستان بيلىگىن اتالعان شەكتەۋلەردى الىپ تاستاۋعا شاقىرعان.

بۇعان دەيىن Human Right Watch حالىقارالىق ۇيىمى جانە باسقا دا قۇقىق قورعاۋشىلار قازاق بيلىگىن كوروناۆيرۋس پاندەمياسىن پايدالانىپ، ادام قۇقىعىن شەكتەپ وتىر دەپ سىناعان.

"The Qazaq Times"