Körneki suret. Foto: Tengrinews / Alihan Sariev

Cifrlıq damu vice-ministri Mälik  Oljabekovtiñ QT redakciyasınıñ swrauına bergen jauabına qarağanda,  «Wlttıq aqparattıq tehnologiya» AQ 2016-2021 jıldar aralığında 6 jılğa juıq uaqıtta 550 mln dollardan asa, wlttıq valyutamen aytqanda 232 mlrd 500 mln teñge jwmsalğan. Al Qazaqstandağı İT qauımdastıq pen azamattıq qoğamnıñ narazılığın tudırğan cirflıq transformaciyalau jobasına da däl osı şamada qarjı qarastırılğan. Biraq aqparattıq qauipsizdikke tikeley qatısı bar asa mañızdı jwmısqa jauaptı tehorındauşı retinde Mäskeu ıqpalı küşti reseylik Sber kompaniyalar tobınıñ  tañdaluı qoğamda qızu talqı tudırdı. Ükimet «jabıq kabinette» qabıldanğan şeşimdi qalay tüsindiredi? Jartı milliard dollar qarızdı arqalaytın Qazaqstan qanday jauapkerşilik arqalaydı?

«Memorandumda «WAT» AQ men Sberbank JAQ arasında oğan qızmet körsetu boyınşa negizgi borış pen payızdar somasına Qazaqstan Respublikasınıñ memlekettik kepildigimen «WAT» AQ paydasına kredit jelisin wsınudı közdeytin qarız turalı kelisim jasasu közdelgen. Kredit jelisi Sberbank JAQ tarapına barlıq qajetti qwjattar uaqtılı wsınılğan jağdayda 2022 jıldıñ birinşi toqsanınıñ soñına deyin 500 mln AQŞ dollarğa balama soma resey rublimen beriledi», – dep jauap bergen vice-ministr Oljabekov.

Atışulı kelisimde körsetilgen negizgi borış pen payız şarttarı, Qazaqstannıñ memlekettik kepildigi turalı naqtılaudı swrağanımızda ministrlik «qarajattıñ tartıluı nemese özge qarjılandıru közderin tartu mäselesin juırda qwrılğan Tehnikalıq sarapşı keñesi egjey-tegjeyli qarap jatqanın, şeşim şığarılatının» habarladı. Sarapşılıq keñestiñ qwramı belgisiz.

«SBER kompaniyasına jüginu mäselesi Amazon Web Services, Microsoft Azure, Google Cloud Platform jäne t. b. köşbasşılarmen qatar halıqaralıq täjiribeni talday otırıp, AT qoğamdastıqpen birlese talqılandı. Bwl rette SBER wsınımın Mäskeu qalasında tiisti ministrlik, «Zerde» WAH» AQ, «WAT» AQ jäne qazaqstandıq IT-kompaniyalardıñ ökilderinen twratın delegaciya tereñdete zerttedi», – dep tüsindirdi. Dese de İT qauımdastıq pen sarapşılar, qoğam tarapınan aşıq irikteu jürgizilmeuiniñ sebebine twşımdı jauap ala almadı.

Biıl 3 qırküyekte Qazaqstan Ükimeti «Cifrlıq transformaciya, cifrlandırudıñ platformalıq modeline köşu jäne «Data-Driven Government» twjırımdaması jönindegi jobalardı iske asıru salasındağı ıntımaqtastıq turalı memorandumğa qol qoyu turalı» №606 qaulısın qabıldağan. Biraq qoğam talqısınsız qabıldanğan şeşim aşıq derekközde keştetip jariyalandı. Qoğam tarapınan sınğa wşırağan memorandumdı jüzege asıruşı Ükimet basşısın azamattıq belsendi Sanavar Zakirova sotqa da bergen.

Ükimet «Sandıq platforma modeline köşu – cifrlandırudıñ kelesi kezeñi äri onı damutağa arnalğan negizgi bağıt retinde 400-den astam jeke jabıq aqparattıq jüyelerdi biriktiruge mümkindik beredi» degen wstanımda. Atalğan salanı transformaciyalau «halıqqa memlekettik qızmet körsetudiñ jıldamdığı men tiimdiligin arttıruğa mümkindik beredi» dep boljaydı.

The Qazaq Times