كورنەكى سۋرەت. فوتو: تengrinews / اليحان ساريەۆ

تسيفرلىق دامۋ ۆيتسە-ءمينيسترى مالىك  ولجابەكوۆتىڭ QT رەداكتسياسىنىڭ سۇراۋىنا بەرگەن جاۋابىنا قاراعاندا،  «ۇلتتىق اقپاراتتىق تەحنولوگيا» اق 2016-2021 جىلدار ارالىعىندا 6 جىلعا جۋىق ۋاقىتتا 550 ملن دوللاردان اسا، ۇلتتىق ۆاليۋتامەن ايتقاندا 232 ملرد 500 ملن تەڭگە جۇمسالعان. ال قازاقستانداعى ءىت قاۋىمداستىق پەن ازاماتتىق قوعامنىڭ نارازىلىعىن تۋدىرعان تسيرفلىق ترانسفورماتسيالاۋ جوباسىنا دا ءدال وسى شامادا قارجى قاراستىرىلعان. بىراق اقپاراتتىق قاۋىپسىزدىككە تىكەلەي قاتىسى بار اسا ماڭىزدى جۇمىسقا جاۋاپتى تەحورىنداۋشى رەتىندە ماسكەۋ ىقپالى كۇشتى رەسەيلىك سبەر كومپانيالار توبىنىڭ  تاڭدالۋى قوعامدا قىزۋ تالقى تۋدىردى. ۇكىمەت «جابىق كابينەتتە» قابىلدانعان شەشىمدى قالاي تۇسىندىرەدى؟ جارتى ميلليارد دوللار قارىزدى ارقالايتىن قازاقستان قانداي جاۋاپكەرشىلىك ارقالايدى؟

«مەموراندۋمدا «ۇات» اق مەن سبەربانك جاق اراسىندا وعان قىزمەت كورسەتۋ بويىنشا نەگىزگى بورىش پەن پايىزدار سوماسىنا قازاقستان رەسپۋبليكاسىنىڭ مەملەكەتتىك كەپىلدىگىمەن «ۇات» اق پايداسىنا كرەديت جەلىسىن ۇسىنۋدى كوزدەيتىن قارىز تۋرالى كەلىسىم جاساسۋ كوزدەلگەن. كرەديت جەلىسى سبەربانك جاق تاراپىنا بارلىق قاجەتتى قۇجاتتار ۋاقتىلى ۇسىنىلعان جاعدايدا 2022 جىلدىڭ ءبىرىنشى توقسانىنىڭ سوڭىنا دەيىن 500 ملن اقش دوللارعا بالاما سوما رەسەي رۋبلىمەن بەرىلەدى»، – دەپ جاۋاپ بەرگەن ۆيتسە-مينيستر ولجابەكوۆ.

اتىشۋلى كەلىسىمدە كورسەتىلگەن نەگىزگى بورىش پەن پايىز شارتتارى، قازاقستاننىڭ مەملەكەتتىك كەپىلدىگى تۋرالى ناقتىلاۋدى سۇراعانىمىزدا مينيسترلىك «قاراجاتتىڭ تارتىلۋى نەمەسە وزگە قارجىلاندىرۋ كوزدەرىن تارتۋ ماسەلەسىن جۋىردا قۇرىلعان تەحنيكالىق ساراپشى كەڭەسى ەگجەي-تەگجەيلى قاراپ جاتقانىن، شەشىم شىعارىلاتىنىن» حابارلادى. ساراپشىلىق كەڭەستىڭ قۇرامى بەلگىسىز.

«سبەر كومپانياسىنا جۇگىنۋ ماسەلەسى Amazon Web Services, Microsoft Azure, Google Cloud Platform جانە ت. ب. كوشباسشىلارمەن قاتار حالىقارالىق تاجىريبەنى تالداي وتىرىپ، ات قوعامداستىقپەن بىرلەسە تالقىلاندى. بۇل رەتتە سبەر ۇسىنىمىن ماسكەۋ قالاسىندا ءتيىستى مينيسترلىك، «زەردە» ۇاح» اق، «ۇات» اق جانە قازاقستاندىق IT-كومپانيالاردىڭ وكىلدەرىنەن تۇراتىن دەلەگاتسيا تەرەڭدەتە زەرتتەدى»، – دەپ ءتۇسىندىردى. دەسە دە ءىت قاۋىمداستىق پەن ساراپشىلار، قوعام تاراپىنان اشىق ىرىكتەۋ جۇرگىزىلمەۋىنىڭ سەبەبىنە تۇششىمدى جاۋاپ الا المادى.

بيىل 3 قىركۇيەكتە قازاقستان ۇكىمەتى «تسيفرلىق ترانسفورماتسيا، تسيفرلاندىرۋدىڭ پلاتفورمالىق مودەلىنە كوشۋ جانە «Data-Driven Government» تۇجىرىمداماسى جونىندەگى جوبالاردى ىسكە اسىرۋ سالاسىنداعى ىنتىماقتاستىق تۋرالى مەموراندۋمعا قول قويۋ تۋرالى» №606 قاۋلىسىن قابىلداعان. بىراق قوعام تالقىسىنسىز قابىلدانعان شەشىم اشىق دەرەككوزدە كەشتەتىپ جاريالاندى. قوعام تاراپىنان سىنعا ۇشىراعان مەموراندۋمدى جۇزەگە اسىرۋشى ۇكىمەت باسشىسىن ازاماتتىق بەلسەندى ساناۆار زاكيروۆا سوتقا دا بەرگەن.

ۇكىمەت «ساندىق پلاتفورما مودەلىنە كوشۋ – تسيفرلاندىرۋدىڭ كەلەسى كەزەڭى ءارى ونى دامۋتاعا ارنالعان نەگىزگى باعىت رەتىندە 400-دەن استام جەكە جابىق اقپاراتتىق جۇيەلەردى بىرىكتىرۋگە مۇمكىندىك بەرەدى» دەگەن ۇستانىمدا. اتالعان سالانى ترانسفورماتسيالاۋ «حالىققا مەملەكەتتىك قىزمەت كورسەتۋدىڭ جىلدامدىعى مەن تيىمدىلىگىن ارتتىرۋعا مۇمكىندىك بەرەدى» دەپ بولجايدى.

The Qazaq Times