Qazaqstanda ipotekalıq qarızı bar äleumettik az qamtılğan toptardı jalğız baspanasınan ayırmaudı qarastıratın memorandum qabıldandı. Oğan Qarjı narığın retteu jäne damıtu agenttigi, Almatı äkimdigi, bankter ombudsmeni, bankter men qoğamdıq birlestikter qol qoyğan. Bwl turalı agenttikke qarastı qarjı qızmetin twtınuşılardıñ qwqığın qorğau departamentiniñ direktorı Aleksandr Terent'ev cözine süyengen Azattıq radiosı habarladı. 

"Memorandum biılğı jıldıñ mausım ayınan beri dayındaldı. Onıñ maqsatı – äleumettik az qamtılğan toptarğa jatatın qarız aluşılardıñ (qosalqı qarız aluşı, garant, kepil beruşi adam) qwqığın taraptar arasında retteu şaraların qabıldau arqılı qorğau" dep jazdı Terent'ev.

Memorandumğa säykes, baspanadan şığarumen baylanıstı problemalıq qarızdardı retteu kezinde bankter sot şağımdarın tüsirudi doğaradı, qarızdı öndirip alu äreketterin tıyıp, qarız aluşılardı üyden şığaruın toqtatadı.

Memorandum 23 qırküyekte küşine engen. Qol qoyğan künnen bastap 12 ayğa deyin jaramdı.

Agenttik memorandum Almatı qalasında qabıldanğanmen bükil respublikağa jaramdı ekenin eskertedi.

Qwjat memorandum bolğandıqtan onı taraptardıñ orındauı mindet emes jäne ondağı şarttar erikti türde jüzege asırıladı.

Bwğan deyin Almatı qalasında bes adamnıñ ömirin qiğan atıs bolıp, jağdaydıñ uşığuına qarız aluşınıñ kreditin ötey almay jalğız baspanasınan küşpen şığarıluı, mülikteriniñ tömen bağalanuı türtki bolğanı habarlanğan. Bwl oqiğadan soñ elde ekinşi deñgeydegi bankterdiñ joğarı payızdıq mölşerlemesi, azamattardı jalğız baspanadan ayıru, ädiletsiz sot şeşimderi siyaqtı mäseleler qayta köterildi.

The Qazaq Times