قازاقستاندا يپوتەكالىق قارىزى بار الەۋمەتتىك از قامتىلعان توپتاردى جالعىز باسپاناسىنان ايىرماۋدى قاراستىراتىن مەموراندۋم قابىلداندى. وعان قارجى نارىعىن رەتتەۋ جانە دامىتۋ اگەنتتىگى، الماتى اكىمدىگى، بانكتەر ومبۋدسمەنى، بانكتەر مەن قوعامدىق بىرلەستىكتەر قول قويعان. بۇل تۋرالى اگەنتتىككە قاراستى قارجى قىزمەتىن تۇتىنۋشىلاردىڭ قۇقىعىن قورعاۋ دەپارتامەنتىنىڭ ديرەكتورى الەكساندر تەرەنتەۆ cوزىنە سۇيەنگەن ازاتتىق راديوسى حابارلادى. 

"مەموراندۋم بيىلعى جىلدىڭ ماۋسىم ايىنان بەرى دايىندالدى. ونىڭ ماقساتى – الەۋمەتتىك از قامتىلعان توپتارعا جاتاتىن قارىز الۋشىلاردىڭ (قوسالقى قارىز الۋشى، گارانت، كەپىل بەرۋشى ادام) قۇقىعىن تاراپتار اراسىندا رەتتەۋ شارالارىن قابىلداۋ ارقىلى قورعاۋ" دەپ جازدى تەرەنتەۆ.

مەموراندۋمعا سايكەس، باسپانادان شىعارۋمەن بايلانىستى پروبلەمالىق قارىزداردى رەتتەۋ كەزىندە بانكتەر سوت شاعىمدارىن ءتۇسىرۋدى دوعارادى، قارىزدى ءوندىرىپ الۋ ارەكەتتەرىن تىيىپ، قارىز الۋشىلاردى ۇيدەن شىعارۋىن توقتاتادى.

مەموراندۋم 23 قىركۇيەكتە كۇشىنە ەنگەن. قول قويعان كۇننەن باستاپ 12 ايعا دەيىن جارامدى.

اگەنتتىك مەموراندۋم الماتى قالاسىندا قابىلدانعانمەن بۇكىل رەسپۋبليكاعا جارامدى ەكەنىن ەسكەرتەدى.

قۇجات مەموراندۋم بولعاندىقتان ونى تاراپتاردىڭ ورىنداۋى مىندەت ەمەس جانە ونداعى شارتتار ەرىكتى تۇردە جۇزەگە اسىرىلادى.

بۇعان دەيىن الماتى قالاسىندا بەس ادامنىڭ ءومىرىن قيعان اتىس بولىپ، جاعدايدىڭ ۋشىعۋىنا قارىز الۋشىنىڭ كرەديتىن وتەي الماي جالعىز باسپاناسىنان كۇشپەن شىعارىلۋى، مۇلىكتەرىنىڭ تومەن باعالانۋى تۇرتكى بولعانى حابارلانعان. بۇل وقيعادان سوڭ ەلدە ەكىنشى دەڭگەيدەگى بانكتەردىڭ جوعارى پايىزدىق مولشەرلەمەسى، ازاماتتاردى جالعىز باسپانادان ايىرۋ، ادىلەتسىز سوت شەشىمدەرى سياقتى ماسەلەلەر قايتا كوتەرىلدى.

The Qazaq Times