Keşe, 9 qırküyek küni keşke Almatı äuejayına qonğan Qazaqstan qarulı küşteriniñ arnayı wşağı Auğanstannan 41 jolauşını jetkizdi. Olardıñ 35-i Auğan qazaqtarı. Bwl turalı Qazaqstan sırtqı ister ministrligi habarladı. 

"Qazaqstan prezidenti Qasım-Jomart Toqaevtıñ tapsırmasına säykes, bügin Auğanstannan 35 qandastıñ tarihi otanına oraluı wyımdastırıldı. Qazaqtarmen birge Auğanstannan Almatığa 4 qazaqstandıq, Qırğızstannıñ 1 azamatı jäne Qazaqstanda twraqtı twratın 1 auğan jetkizildi.Kelgen jolauşılar karantinnen ötu üşin uaqıtşa oqşaulanadı. Evakuaciyalıq reysti wyımdastıru "Taliban" qozğalısımen üylestirilip jüzege asırıldı" delingen SİM habarlamasında.

Ministrlik mälimetinşe, Qazaqstannıñ Kabuldağı elşiligi qalıptı rejimde jwmıs istep jatır jäne Auğanstanda twratın qandastarmen twraqtı baylanısta.

"Ötiniş beruşilerdiñ etnikalıq säykestigin rastau jäne qandastardı qaytaru jwmıstarı jalğasadı" dep habarladı SİM.

Qazaqstan biligi "Auğanstanda 15 qazaq otbası nemese 200-ge tarta etnikalıq qazaq bar" dep mälimdegen. Biraq Auğanstanda twratın qazaqtar özderiniñ bwdan köp ekenin aytıp, 30-ğa tarta otbasın sanap şıqqan.

The Qazaq Times