Foto: Reuters

18 tamızdıñ keşinde Almatı äuejayına Birikken Wlttar Wyımınıñ Auğanstandağı bir top qızmetkeri mingen wşaq qondı. Olar Auğanstandağı jağday twraqtağanşa, Qazaqstanda bolmaq. Bwl turalı Qazaqstan sırtqı ister ministrligi habarladı.

"Auğanstandağı işki sayasi ahualdıñ şielenisuine baylanıstı Birikken Wlttar Wyımı (BWW) öziniñ Auğanstanğa järdem körsetu jönindegi missiyasın (UNAMA) jäne AIR-da akkredittelgen BWW-nıñ basqa da agenttikterin Almatı qalasına uaqıtşa ornalastıru turalı Qazaqstanğa ötiniş bildirdi. Qazaqstan men BWW-nıñ jan-jaqtı özara is-qimılı ruhı şeñberinde jäne osı wyımnıñ tolıq qwqıqtı müşesi retindegi mindettemeleri ayasında Prezident Qasım-Jomart Toqaev BWW ötinişin qoldau turalı şeşim qabıldadı" delingen ministrlik baspasöz habarlamasında.

Qazaqstandıq resmi basılımdar wşaq bortında 141 adamnıñ bolğanın, olardıñ bäri UNAMA qızmetkerleri ekenin habarladı.

Osınıñ aldında BWW Auğanstandağı 300 halıqaralıq qızmetkeriniñ üşten birin Qazaqstanğa ornalastıratının mälimdegen.

BWW-nıñ resmi ökili Stefan Dyujarrik 18 tamız küni jüzge tarta halıqaralıq qızmetkeriniñ uaqıtşa Almatı qalasında bolatının aytqan.

"Bwl – uaqıtşa şara. Ol BWW-nıñ Auğanstan halqına qolaysızdıqtı meylinşe azayta otırıp, BWW qızmetkerlerine qauip töndirmey kömektesu üşin qajet" dedi Dyujarrik särsenbi küni.

Ministrliktiñ habarlauınşa, Qazaqstanğa 18 tamız küni kelgeni UNAMA qızmetkerleri. SİM olardıñ halıqaralıq diplomat ekenin, qoldarında BWW pasportı barın aytadı.

SİM habarlamasına qarağanda, BWW qızmetkerleri Qazaqstanda Auğanstandağı jağday twraqtağanşa, şamamen altı ay boladı dep kelisilgen.

Ministrlik qızmetkerlerdiñ Qazaqstanda twru şığının BWW-nıñ özi köteretinin mälimdedi.

The Qazaq Times