Almatı qalasındağı qoqıs poligondarınıñ biri. Foto: 24.kz

Ekologiya ministri Mağzwm Mırzağaliev halıq aldındağı eseptik kezdesuinde elimizdiñ 6 öñirinde qoqıs örteytin zauıt salınatının mälimdedi.

Bügin elge esep bergen vedomstvo basşısınıñ aytuınşa, qaldıq kölemin qısqartu maqsatında Waste to Energy qaldıqtardı energetikalıq kädege jaratu tetigin engizu jönindegi zañ qabıldandı.

«Qoqıs jağatın zauıttar salu üşin altı qala belgilendi. Olar: Nwr-Swltan, Aqtöbe, Almatı, Şımkent, Qarağandı jäne Öskemen. Äkimdikter zauıt qwrılısına qajet jer telimderin böldi. Energiya beruşi wyımnan elektr jelisine qosudıñ tayau nüktelerin bekitti. Energiya öndiruşi wyımdardıñ tizbesin qalıptastıru üşin aukciondı ötkizuge qwjattardı qabıldau bastaldı. Ekinşi jartıjıldıqta qorıtındı şığaramız», – dedi ekologiya, geologiya jäne tabiği resurstarı ministri.

Mırzağaliev zañsız qoqıs poligondarınıñ problemasın söz etti.

«Ğarıştıq monitoring ayasında jıl sayın 8000-ğa juıq qoqıs üyindisi anıqtaladı. Bwl rette, rwqsat etilmegen qoqıs üyindileri mäselesin jüyeli şeşu üşin jaña Ekologiya kodeksinde qoqıs şığaratın kölikterge GPS-datçikterdi mindetti türde ornatu mäselesi közdelgen. Qaldıqtardı qayta öñdeumen jäne kädege jaratumen aynalısatın käsiporındar üşin licenziyalau jäne qoqıs şığaratın wyımdar üşin habarlama jasau tärtibi engizildi», – dedi ol.

"The Qazaq Times"