Fotokollaj: sites

Euroodaq Belarus'ke sankciya salu turalı şeşim şığardı. Endi Belarus'qa qarastırılğan 3 milliard euro köleminde investiciyalıq jäne ekonomikalıq kömek körsetilmeydi.

Bwğan deyin Europa wşaqtarın Belarus' äue keñistiginiñ üstimen wşırmau turalı şeşim qabıldağan. Sankciya küşine engennen bastap belorus aviaciyasına odaqtıñ 27 memleketiniñ äue keñistigin paydalanuğa tıyım salınadı.

Eurokomissiya törağası Ursula fon der Lyayen: «Belarus' biligi öziniñ äue keñistigin wşaqtı aydap äketu üşin qoldandı. Sol sebepti bwl eldiñ äue keñistigi arqılı wşaqtar bwdan bılay qauipsiz wşa alatınına kümän bar. Osığan baylanıstı Euroodaq Keñesi Belarus' wşaqtarına odaqqa müşe memleketterdiñ äue keñistigin paydalanuına jäne äuejaylarına qonuına tıyım salıp otır», – dedi.

23 mamırda Ryanair äue kompaniyasınıñ Grekiyadan Litvağa bara jatqan reysi kenetten bağıtın özgertip, Minskige qonuğa mäjbür boldı. Belarus' biligi arnayı äskeri wşaq jiberip, reyste bomba boluı mümkin dep habarlap, wşaqtı Minskige bwrğan. Borttan bomba tabılmadı, esesine Belarus' policiyası wşaqta bolğan oppoziciyalıq jurnalist, NEXTA Live telegram kanalın qwruşılardıñ biri Roman Protaseviçti twtqındadı.

Bwl halıqaralıq därejede dau tuğızdı. Batıs elderi Belarus' biliginiñ äreketin ayıptap, jurnalisti bosatudı talap etti. Sonımen qatar Latviya wşaqtarın Belarus' üstimen wşırmaytının mälimdegen. Ukraina prezidenti Vladimir Zelenskiy de ükimetke Belarus'pen äue reysterin toqtatudı jäne bwl eldiñ töbesimen wşaq wşıruğa tıyım saludı tapsırdı.

Al qazaqstandıq Air Astana äue kompaniyası Almatıdan Minskige tikeley reys wşırudı keyinge qaldırdı.

"The Qazaq Times"