Körneki suret. Foto: aşıq derekköz

Bügin otız kün oraza wstağan barşa mwsılmannıñ Oraza Ayt merekesi. Islam küntizbesi boyınşa Şäuuäl ayınıñ alğaşqı künine tura keletin bwl mereke bir ay oraza wstağan jamağattıñ igilik pen baqıt,rahımğa jetkeniniñ beynesi ispetti atalıp ötiledi. Sonday-aq, bwl mwsılmandar üşin oraza wstauğa tıyım salınğan kün.

Beysenbi, 13 mamır tañerteñ Qazaqstan meşitterinde Oraza ayt namazı oqıldı. Ekinşi jılğa jalğasqan koronavirus pandemiyasınıñ karantindik şekteui sebepti namaz meşitter aulasında oqıldı. Bıltır mülde tıyım salınğan edi. Apta basında Qazaqstannıñ Mwsılmandar dini basqarması osınday şeşim qabıldağan. Şart boyınşa wjımdıq ğibadatqa jinalğan jwrt medicinalıq betperde tağıp keluge mindettelgen.

Oraza ayt namazı Almatı qalasında tañğı 6.10-da, al astanada 7.00-de oqıldı. Mwsılman älemi qasiet twtatın biılğı Ramazan ayı elde 13 säuirde bastalğan.

Merekege oray elimizdegi jäne älemdegi barşa mwsılman jwrtşılığın oraza ayt künimen qwttıqtaymız! Wstağan orazalarıñız ben tilegen dwğa-tilekteriñiz qabıl bolsın! Jer betinde beybitşilik saltanat qwrıp, bar adamzat zäuzatı ıntımaqta ğwmır keşsin! Sanalı adam balası tabiğattı ayalap, Jer ananıñ ayalı alaqanında üylesimmen ündestikte ömir sürelik! Ädildik jasasın, aqiqat qanat jaysın!

"The Qazaq Times"