Aqtöbe äkimi men assambleyalıqtardıñ wpayına keyipker bolğan Ayswlu Küzdibaeva. Foto: YouTube

«Halıq ünine qwlaq asatın memlekettiñ» şeneunikteri men Aqtöbe oblısınıñ äkimi köp balalı anağa «jalğan» sertifikat sıylağan.

«Astana» telearnasınıñ mälimetinşe, Alğıs aytu küni – naurız ayınıñ alğaşqı küni köp balalı äyel Ayswlu Qüzdibaevağa oblıs äkimi Oñdasın Orazalin 2 mln teñge köleminde arnayı serifikat tabıstağan. Degenmen aqtöbelik twrğınnıñ qolındağı sertifikattıñ, anığı ondağı eki buma milionnıñ eş küşi joq bolıp şıqtı.

Bwl jañalıqqa erekşe quanğan Ayswlu Qüzdibaeva 2 mln teñgeniñ üstine qarızdanıp-qauğalanıp bolsa da qosımşa qarjı qosıp, baspana satıp aluğa jospar qwrıp ülgergen. Biraq quanışı wzaqqa sozılmadı.

«Oblıs äkiminiñ özi berdi. Men 2 million teñge mende bar eken dep oyladım. Üstine tağı aqşa jinap, basqa baspana satıp alamın degenmin. Körşilerim de kelip qwttıqtağan. Bwl jäy qağaz bolıp şıqtı», – deydi Qüzdibaeva.

Qüzdibaeva Aqtöbege köşip kelgenine köp bola qoymağan. Bes birdey balasımen quıqtay 14 şarşı metrlik kommunaldı päterde twrıp jatqan oğan alğaşında eriktiler wyımdasıp kömektesken. Päterin jöndep-ärlep, hal-qadirinşe jihaz alıp bergen.

Aqparat qwraldarında jariyalağan derekterge say, jergilik biliktiñ taqıs şeneunikteri aylağa salıp, Qazaqstan halqı assambleyası Aqtöbe oblıstıq filialı eriktilerdiñ eñbegin iemdenip, 1 naurızdağı is-şarada «eş qwnı joq sertifikat» tapsırğan. Tipti şeneunikter köp balalı äyelge sertifikattıñ jay qojakörsindikke bergenin aytadı. Olardıñ «bar eñbegi» – eriktilerden jıluğa jinalğan qarajattıñ kölemin swrap alıp, printrden sertifikat naqışında basıp şığarıp köptiñ közinşe tabıstauı ğana.

«Biz jastardan: «Jöndeuge qanşa qarjı jwmsadıñdar?», – dep swradıq. Olardıñ sözinşe, jöndeu jwmıstarı men jihazğa 2 millionğa juıq qarjı jwmsalğan. Kömek  jasalğan sommanı körsetu üşin Ayswluğa osı sertifikattı tabıstadıq. Ol «bwl qarjını mağan bere me?», – dep swradı. Biz bwl sommağa jöndeu jwmıstarı jasalğanın, osını körsetkimiz kelgenin tüsindirdik», – Qazaqstan halqı Assambleyasınıñ Aqtöbe oblıstıq hatşılığınıñ  meñgeruşisi Marjan Qorğanbaeva.

Äleumettik jelilerde eriktilerdiñ kömegin maldanbaq bolğan şeneunikter men äkim Orazalin imdjine nwqsan keltirip alğanı jöninde ayıptau mäninde sıni pikir köbeyip jatır. «Estitin memleket» qwrudı kökseytin biliktiñ kadrları osılayşa jwrttıñ şın rizaşılığı üşin emes, qojakörsin baqay esep üşin äreket etui köpşiliktiñ ızasın tudıruda.

“The Qazaq Times”