«ەستيتىن ۇكىمەتتىڭ» ايلاسى: اقتوبە اكىمى مەن اسسامبلەيا كوپ بالالى اناعا جالعان سەرتيفيكات سىيلاعان

«حالىق ۇنىنە قۇلاق اساتىن مەملەكەتتىڭ» شەنەۋنىكتەرى مەن اقتوبە وبلىسىنىڭ اكىمى كوپ بالالى اناعا «جالعان» سەرتيفيكات سىيلاعان.

«استانا» تەلەارناسىنىڭ مالىمەتىنشە، العىس ايتۋ كۇنى – ناۋرىز ايىنىڭ العاشقى كۇنى كوپ بالالى ايەل ايسۇلۋ قۇزدىباەۆاعا وبلىس اكىمى وڭداسىن ورازالين 2 ملن تەڭگە كولەمىندە ارنايى سەريفيكات تابىستاعان. دەگەنمەن اقتوبەلىك تۇرعىننىڭ قولىنداعى سەرتيفيكاتتىڭ، انىعى ونداعى ەكى بۋما ميليوننىڭ ەش كۇشى جوق بولىپ شىقتى.

بۇل جاڭالىققا ەرەكشە قۋانعان ايسۇلۋ قۇزدىباەۆا 2 ملن تەڭگەنىڭ ۇستىنە قارىزدانىپ-قاۋعالانىپ بولسا دا قوسىمشا قارجى قوسىپ، باسپانا ساتىپ الۋعا جوسپار قۇرىپ ۇلگەرگەن. بىراق قۋانىشى ۇزاققا سوزىلمادى.

«وبلىس اكىمىنىڭ ءوزى بەردى. مەن 2 ميلليون تەڭگە مەندە بار ەكەن دەپ ويلادىم. ۇستىنە تاعى اقشا جيناپ، باسقا باسپانا ساتىپ الامىن دەگەنمىن. كورشىلەرىم دە كەلىپ قۇتتىقتاعان. بۇل ءجاي قاعاز بولىپ شىقتى»، – دەيدى قۇزدىباەۆا.

قۇزدىباەۆا اقتوبەگە كوشىپ كەلگەنىنە كوپ بولا قويماعان. بەس بىردەي بالاسىمەن قۋىقتاي 14 شارشى مەترلىك كوممۋنالدى پاتەردە تۇرىپ جاتقان وعان العاشىندا ەرىكتىلەر ۇيىمداسىپ كومەكتەسكەن. پاتەرىن جوندەپ-ارلەپ، حال-قادىرىنشە جيھاز الىپ بەرگەن.

اقپارات قۇرالدارىندا جاريالاعان دەرەكتەرگە ساي، جەرگىلىك بيلىكتىڭ تاقىس شەنەۋنىكتەرى ايلاعا سالىپ، قازاقستان حالقى اسسامبلەياسى اقتوبە وبلىستىق فيليالى ەرىكتىلەردىڭ ەڭبەگىن يەمدەنىپ، 1 ناۋرىزداعى ءىس-شارادا «ەش قۇنى جوق سەرتيفيكات» تاپسىرعان. ءتىپتى شەنەۋنىكتەر كوپ بالالى ايەلگە سەرتيفيكاتتىڭ جاي قوجاكورسىندىككە بەرگەنىن ايتادى. ولاردىڭ «بار ەڭبەگى» – ەرىكتىلەردەن جىلۋعا جينالعان قاراجاتتىڭ كولەمىن سۇراپ الىپ، پرينتردەن سەرتيفيكات ناقىشىندا باسىپ شىعارىپ كوپتىڭ كوزىنشە تابىستاۋى عانا.

«ءبىز جاستاردان: «جوندەۋگە قانشا قارجى جۇمسادىڭدار؟»، – دەپ سۇرادىق. ولاردىڭ سوزىنشە، جوندەۋ جۇمىستارى مەن جيھازعا 2 ميلليونعا جۋىق قارجى جۇمسالعان. كومەك  جاسالعان سوممانى كورسەتۋ ءۇشىن ايسۇلۋعا وسى سەرتيفيكاتتى تابىستادىق. ول «بۇل قارجىنى ماعان بەرە مە؟»، – دەپ سۇرادى. ءبىز بۇل سومماعا جوندەۋ جۇمىستارى جاسالعانىن، وسىنى كورسەتكىمىز كەلگەنىن تۇسىندىردىك»، – قازاقستان حالقى اسسامبلەياسىنىڭ اقتوبە وبلىستىق حاتشىلىعىنىڭ  مەڭگەرۋشىسى مارجان قورعانباەۆا.

الەۋمەتتىك جەلىلەردە ەرىكتىلەردىڭ كومەگىن مالدانباق بولعان شەنەۋنىكتەر مەن اكىم ورازالين يمدجىنە نۇقسان كەلتىرىپ العانى جونىندە ايىپتاۋ مانىندە سىني پىكىر كوبەيىپ جاتىر. «ەستيتىن مەملەكەت» قۇرۋدى كوكسەيتىن بيلىكتىڭ كادرلارى وسىلايشا جۇرتتىڭ شىن ريزاشىلىعى ءۇشىن ەمەس، قوجاكورسىن باقاي ەسەپ ءۇشىن ارەكەت ەتۋى كوپشىلىكتىڭ ىزاسىن تۋدىرۋدا.

“The Qazaq Times”