Tuıstarınan habar ala almay äri negizsiz sottalğan jaqındarına araşa swrağan bir top narazı Almatı qalasındağı Qıtay konsuldığınıñ aldında. Foto: QT

Almatıdağı Qıtay konsuldığınıñ aldında tuıstarına araşa swrağan bir top äyeldiñ qarsılıq akciyasına şığıp jürgenine bir aydıñ jüzi boldı. Ne Qazaqstan Ükimeti, ne Qıtay elşiligi ün qatar emes.

Bügin 11 naurız küni mitingke şıqqan narazılardıñ keybiri densaulığı sır berip, qan qısımı köterilip talıp qaldı. Akciyağa qatısuşı 57 jastağı Külbara Ömiräli Qıtayda 1995 jılğı inisiniñ dini senimine bola 15 jılğa sottalğanın, onıñ negizsiz ayıptalğanın aşına ayttı. Sonımen qosa, bügingi narazılıqqa osığan deyin Qıtayda sottalğan inisin bosatudı talap etip sankciyalanbağan piket ötkizgeni üşin 10 künge qamalıp şıqqan belsendi Baybolat Künbolatwlınıñ 60 jastağı anası Zauathan Twrsın da qatıstı.

Beysenbi küngi narazılıq jiınına ädettegidey jergilikti äkimdik pen prokuratura qızmetkerleri kelip şaranıñ zañsız ekenin alğa tartıp, eskertu jasadı.

Sebepsiz qamalğan tuıstarın bosatu talabımen aqpan ayınıñ basınan beri kün sayın konsuldıq aldına kelip jürgen köpşilik Qazaqstan biliginen kömek swraydı. Bwdan özge, olar halıqaralıq adam qwqığın qorğau wyımdarınan kömek swrau üşin aqşa jinauğa da kirisken.

Sırtqı ister ministrligi 25 aqpanda Aqorda men Beyjiñ Qıtayda qalğan qazaqtar mäselesin onlayn rejimde talqılağanın habarlağan. Biraq konsuldıq aldında mitingke şığıp jürgender talay talqı ötse de naqtı nätije bolmağanına qapalı.

«Qıtay genocidin toqtatudı» talap etken azamattar şekaranıñ arğı betinde negisiz wzaq jıldarğa sottalğan tuıstarın tez arada bosatu jäne elge jiberudi swraydı. Naqaq qamalıp otır delingen jandardıñ arasında Qazaqstan azamattarı da bar. Qwzırlı organdar olar memleket qorğauında ekenin aytqanımen, bilik azamattarı men qandastarımızğa araşa boludıñ ornına, osındağı narazılardı jauapqa tartıp älek.

"The Qazaq Times"