«ەستيتىن مەملەكەتتىڭ ۇنسىزدىگى» – نارازىلاردىڭ قىتاي كونسۋلدىعى الدىندا جۇرگەنىنە ءبىر ايدان استى

الماتىداعى قىتاي كونسۋلدىعىنىڭ الدىندا تۋىستارىنا اراشا سۇراعان ءبىر توپ ايەلدىڭ قارسىلىق اكتسياسىنا شىعىپ جۇرگەنىنە ءبىر ايدىڭ ءجۇزى بولدى. نە قازاقستان ۇكىمەتى، نە قىتاي ەلشىلىگى ءۇن قاتار ەمەس.

بۇگىن 11 ناۋرىز كۇنى ميتينگكە شىققان نارازىلاردىڭ كەيبىرى دەنساۋلىعى سىر بەرىپ، قان قىسىمى كوتەرىلىپ تالىپ قالدى. اكتسياعا قاتىسۋشى 57 جاستاعى كۇلبارا ءومىرالى قىتايدا 1995 جىلعى ءىنىسىنىڭ ءدىني سەنىمىنە بولا 15 جىلعا سوتتالعانىن، ونىڭ نەگىزسىز ايىپتالعانىن اشىنا ايتتى. سونىمەن قوسا، بۇگىنگى نارازىلىققا وسىعان دەيىن قىتايدا سوتتالعان ءىنىسىن بوساتۋدى تالاپ ەتىپ سانكتسيالانباعان پيكەت وتكىزگەنى ءۇشىن 10 كۇنگە قامالىپ شىققان بەلسەندى بايبولات كۇنبولاتۇلىنىڭ 60 جاستاعى اناسى زاۋاتحان تۇرسىن دا قاتىستى.

بەيسەنبى كۇنگى نارازىلىق جيىنىنا ادەتتەگىدەي جەرگىلىكتى اكىمدىك پەن پروكۋراتۋرا قىزمەتكەرلەرى كەلىپ شارانىڭ زاڭسىز ەكەنىن العا تارتىپ، ەسكەرتۋ جاسادى.

سەبەپسىز قامالعان تۋىستارىن بوساتۋ تالابىمەن اقپان ايىنىڭ باسىنان بەرى كۇن سايىن كونسۋلدىق الدىنا كەلىپ جۇرگەن كوپشىلىك قازاقستان بيلىگىنەن كومەك سۇرايدى. بۇدان وزگە، ولار حالىقارالىق ادام قۇقىعىن قورعاۋ ۇيىمدارىنان كومەك سۇراۋ ءۇشىن اقشا جيناۋعا دا كىرىسكەن.

سىرتقى ىستەر مينيسترلىگى 25 اقپاندا اقوردا مەن بەيجىڭ قىتايدا قالعان قازاقتار ماسەلەسىن ونلاين رەجيمدە تالقىلاعانىن حابارلاعان. بىراق كونسۋلدىق الدىندا ميتينگكە شىعىپ جۇرگەندەر تالاي تالقى وتسە دە ناقتى ناتيجە بولماعانىنا قاپالى.

«قىتاي گەنوتسيدىن توقتاتۋدى» تالاپ ەتكەن ازاماتتار شەكارانىڭ ارعى بەتىندە نەگىسىز ۇزاق جىلدارعا سوتتالعان تۋىستارىن تەز ارادا بوساتۋ جانە ەلگە جىبەرۋدى سۇرايدى. ناقاق قامالىپ وتىر دەلىنگەن جانداردىڭ اراسىندا قازاقستان ازاماتتارى دا بار. قۇزىرلى ورگاندار ولار مەملەكەت قورعاۋىندا ەكەنىن ايتقانىمەن، بيلىك ازاماتتارى مەن قانداستارىمىزعا اراشا بولۋدىڭ ورنىنا، وسىنداعى نارازىلاردى جاۋاپقا تارتىپ الەك.

"The Qazaq Times"