Gaagadağı halıqaralıq sot tarabınan Izrail'diñ äskeri qılmısı turalı tergeu jürip jatır. Tergeu 2014 jıldan bergi Batıs jağalau, Şığıs Ierusalim jäne Gaza sektorı sekildi Palestinge tiesili territoriyalardağı Izrail'diñ soğıs qılmısına tän äreketterin qarastırudı qamtidı.

Izrail' prem'er-ministri Gaagadağı halıqaralıq sot şeşimin antisemizmdik jäne ekijüzdilik şeşim dep ayıptağan. «Halıqaralıq sot bizdiñ älemdegi birden bir terrorşılarğa raqımşılıq jasamaytın, er jürek jauıngerlerimizdi soğıs qılmıskeri dep körsetti. Faşisterdiñ evrey halqına qarsı jasağan jan türşigerlik äreketteriniñ qaytalanuına jol bermeu maqsatında qwrılğan sot endi evrey memleketine qarsı şığıp otır», – degen Benyamin' Netanyahu.

Degenmen, Palestin avtonomiyasınıñ sırtqı ister ministri Riad Malik bwğan qarsı öz uäjin aytqan. Ol sözinde: «Palestin eline izrail'dik basqınşılar tarabınan jüyeli türde jasalıp jatqan jäne barğan sayın keñeyip kele jatqan qılmıstarın anıqtau, onı belsendi türde ayıptau kezek küttirmeydi», – degen. Gazanı baqılauına alıp otırğan «Hamas» wyımı da Gaaga sotınıñ şeşimin quattap mälimdeme jasadı.

Gaaga sotı tergeu-tekseru barısında Izrail' äskerileriniñ Gazadağı äskeri operaciyaları men Batıs jağalaudağı äskeri nısandardı tekseru nısanası etui mümkin. Sonday-aq, bir jaqtı Izrail' äskerilerine ğana emes, körşiles elderdiñ beybit twrğındarına qauip töndirgen palestindik qwraldı küşterdiñ äreketi de sarapqa salınuı mümkin.

Mälimetterge qarağanda, 2014 jıldan beri Izrail' armiyasınıñ Gazadağı Palestindi azat etu wyımına qarsı auqımdı qarulı äreketterinen 2 mıñnan astam palestinalıq qaza tapqan. Al, Izrail' tarabınan äskerler men beybit twrğındardı qosqanda 70 adam köz jwmğan.

“The Qazaq Times”