گااگاداعى حالىقارالىق سوت تارابىنان ءيزرايلدىڭ اسكەري قىلمىسى تۋرالى تەرگەۋ ءجۇرىپ جاتىر. تەرگەۋ 2014 جىلدان بەرگى باتىس جاعالاۋ، شىعىس يەرۋساليم جانە گازا سەكتورى سەكىلدى پالەستينگە تيەسىلى تەرريتوريالارداعى ءيزرايلدىڭ سوعىس قىلمىسىنا ءتان ارەكەتتەرىن قاراستىرۋدى قامتيدى.

يزرايل پرەمەر-ءمينيسترى گااگاداعى حالىقارالىق سوت شەشىمىن انتيسەميزمدىك جانە ەكىجۇزدىلىك شەشىم دەپ ايىپتاعان. «حالىقارالىق سوت ءبىزدىڭ الەمدەگى بىردەن ءبىر تەررورشىلارعا راقىمشىلىق جاسامايتىن، ەر جۇرەك جاۋىنگەرلەرىمىزدى سوعىس قىلمىسكەرى دەپ كورسەتتى. فاشيستەردىڭ ەۆرەي حالقىنا قارسى جاساعان جان تۇرشىگەرلىك ارەكەتتەرىنىڭ قايتالانۋىنا جول بەرمەۋ ماقساتىندا قۇرىلعان سوت ەندى ەۆرەي مەملەكەتىنە قارسى شىعىپ وتىر»، – دەگەن بەنيامين نەتانياحۋ.

دەگەنمەن، پالەستين اۆتونومياسىنىڭ سىرتقى ىستەر ءمينيسترى رياد مالىك بۇعان قارسى ءوز ءۋاجىن ايتقان. ول سوزىندە: «پالەستين ەلىنە يزرايلدىك باسقىنشىلار تارابىنان جۇيەلى تۇردە جاسالىپ جاتقان جانە بارعان سايىن كەڭەيىپ كەلە جاتقان قىلمىستارىن انىقتاۋ، ونى بەلسەندى تۇردە ايىپتاۋ كەزەك كۇتتىرمەيدى»، – دەگەن. گازانى باقىلاۋىنا الىپ وتىرعان «حاماس» ۇيىمى دا گااگا سوتىنىڭ شەشىمىن قۋاتتاپ مالىمدەمە جاسادى.

گااگا سوتى تەرگەۋ-تەكسەرۋ بارىسىندا يزرايل اسكەريلەرىنىڭ گازاداعى اسكەري وپەراتسيالارى مەن باتىس جاعالاۋداعى اسكەري نىسانداردى تەكسەرۋ نىساناسى ەتۋى مۇمكىن. سونداي-اق، ءبىر جاقتى يزرايل اسكەريلەرىنە عانا ەمەس، كورشىلەس ەلدەردىڭ بەيبىت تۇرعىندارىنا قاۋىپ توندىرگەن پالەستيندىك قۇرالدى كۇشتەردىڭ ارەكەتى دە ساراپقا سالىنۋى مۇمكىن.

مالىمەتتەرگە قاراعاندا، 2014 جىلدان بەرى يزرايل ارمياسىنىڭ گازاداعى پالەستيندى ازات ەتۋ ۇيىمىنا قارسى اۋقىمدى قارۋلى ارەكەتتەرىنەن 2 مىڭنان استام پالەستينالىق قازا تاپقان. ال، يزرايل تارابىنان اسكەرلەر مەن بەيبىت تۇرعىنداردى قوسقاندا 70 ادام كوز جۇمعان.

“The Qazaq Times”