Bwdan 7 jılday bwrın Iraktıñ Mosul qalasında alğaş ret «Halifat» jariyalap, Irak pen Süriya jerinde biraz jıl lañ salğan özderin «Islam memleketi» atağan ekstremistik top qayta küş jinauda. Bwl turalı Birikken Wlttar Wyımınıñ Qauipsizdik keñesi eskertu jasadı.

DAIŞ-ke qarsı Halıqaralıq koaliciyağa jetekşilik etken AQŞ 2019 jılı Irak pen Süriya jerinde jeñiske jetkenin jariyalağan. Irak ta birneşe jıldıq soğıstan keyin eldegi DAIŞ küşterin joyğanın, azdağan toptarımen kürestiñ jalğasıp jatqanın habarlağan. Alayda, 2018 jıldıñ soñınan bastap, «Islam memleketi» sodırlarınıñ sayasi twraqsızdıq ornağan Auğanstanğa jinalıp jatqanı turalı mälimetter tarağan.

BWW janındağı Terrorizmge qarsı küres bölimi eki kün bwrın Qauipsizdik keñeske DAIŞ wyımınıñ qimıl-äreketterine qatıstı jaña esebin wsındı. Onda atalmış terrorlıq wyımnıñ 2020 jıldıñ ekinşi jartısınan bastap jihadşılardı qayta jinay bastağanın, sonday-aq äreketterin jandandıra bastağanı aytılğan.

BWW-ğa jetken mälimetke qarağanda, DAŞI qarulı toptarı Irak pen Süriyadağı pandemiya kezindegi dağdarıstan paydalanıp, keybir öñirlerde belsendiligin arttırğan. Terrorizmge qarsı küres böliminiñ taratqan mälimetinde, 2021 jılı DAIŞ älemniñ birqatar elinde qarulı şabuıldar wyımdastıru ıqtimaldığı bar dep körsetedi. Wyım esebinşe Irak jerinde DAIŞ jihadşılarınıñ 10 mıñğa juıq qarulı sodırı bar.

“The Qazaq Times”