بۇدان 7 جىلداي بۇرىن يراكتىڭ موسۋل قالاسىندا العاش رەت «حاليفات» جاريالاپ، يراك پەن ءسۇريا جەرىندە ءبىراز جىل لاڭ سالعان وزدەرىن «يسلام مەملەكەتى» اتاعان ەكسترەميستىك توپ قايتا كۇش جيناۋدا. بۇل تۋرالى بىرىككەن ۇلتتار ۇيىمىنىڭ قاۋىپسىزدىك كەڭەسى ەسكەرتۋ جاسادى.

دايش-كە قارسى حالىقارالىق كواليتسياعا جەتەكشىلىك ەتكەن اقش 2019 جىلى يراك پەن ءسۇريا جەرىندە جەڭىسكە جەتكەنىن جاريالاعان. يراك تا بىرنەشە جىلدىق سوعىستان كەيىن ەلدەگى دايش كۇشتەرىن جويعانىن، ازداعان توپتارىمەن كۇرەستىڭ جالعاسىپ جاتقانىن حابارلاعان. الايدا، 2018 جىلدىڭ سوڭىنان باستاپ، «يسلام مەملەكەتى» سودىرلارىنىڭ ساياسي تۇراقسىزدىق ورناعان اۋعانستانعا جينالىپ جاتقانى تۋرالى مالىمەتتەر تاراعان.

بۇۇ جانىنداعى تەرروريزمگە قارسى كۇرەس ءبولىمى ەكى كۇن بۇرىن قاۋىپسىزدىك كەڭەسكە دايش ۇيىمىنىڭ قيمىل-ارەكەتتەرىنە قاتىستى جاڭا ەسەبىن ۇسىندى. وندا اتالمىش تەررورلىق ۇيىمنىڭ 2020 جىلدىڭ ەكىنشى جارتىسىنان باستاپ جيھادشىلاردى قايتا جيناي باستاعانىن، سونداي-اق ارەكەتتەرىن جانداندىرا باستاعانى ايتىلعان.

بۇۇ-عا جەتكەن مالىمەتكە قاراعاندا، داشي قارۋلى توپتارى يراك پەن سۇرياداعى پاندەميا كەزىندەگى داعدارىستان پايدالانىپ، كەيبىر وڭىرلەردە بەلسەندىلىگىن ارتتىرعان. تەرروريزمگە قارسى كۇرەس ءبولىمىنىڭ تاراتقان مالىمەتىندە، 2021 جىلى دايش الەمنىڭ بىرقاتار ەلىندە قارۋلى شابۋىلدار ۇيىمداستىرۋ ىقتيمالدىعى بار دەپ كورسەتەدى. ۇيىم ەسەبىنشە يراك جەرىندە دايش جيھادشىلارىنىڭ 10 مىڭعا جۋىق قارۋلى سودىرى بار.

“The Qazaq Times”