Keşe, 18 qaraşa küni AQŞ, Australiya, Kanada, Jaña Zelandiya jäne Britaniya qatarlı elderdiñ ükimetteri Qıtayğa qarata birlesken mälimdeme jasadı. Olar Gonkong Parlamentindegi demokratiyalıq zañ şığaruşılardıñ ornın qalpına keltirudi talap etken.

Birlesken mälimdemeni atalğan elderdiñ Sırtqı ister ministrlikteri jasağan. Olar bir auızdan Beyjiñniñ Gonkongta «Wlttıq qauipsizdik turalı jaña zañ» jobasın engizui, Zañ şığaru keñesin saylaudı keyinge qaldıruı, sonday-aq Zañ şığaru keñesindegi demokrattardı şettetui Qıtaydıñ halıqaralıq kelisimderge say mindetterin bwzadı dep eskertken. Sonday-aq, bwnday äreketter Gonkongtıñ erkindigi men joğarı deñgeydegi avtonomiyalıq statusın bwzadı degen alañdauşılıqtarın jetkizgen.

Särsenbide Gonkong policiyası zañ şığaru keñesiniñ bwrınğı 3 müşesin qamauğa aldı. Gonkong bwqaralıq aqparat qwraldarınıñ habarlauınşa, soñğı aylarda köptegen demokratiyalıq parlamentşiler men olardıñ kömekşileri qamauğa alınğan. Birlesken mälimdemede Bejiñ Gonkongtıñ Zañ şığaru keñesindegi demokrat toptardı maqsattı ığıstırıp otır dep ayıptağan. Olar Gonkong twrğındarınıñ saylau qwqığın bwzbauğa şaqırğan.

Bes eldiñ birlesken mälimdemesinde, Qıtay ortalıq biligin Gonkong twrğındarınıñ azamattıq oy pikirin bildiru bostandığı qwrmetteuge de şaqırğan. Biraq, Qıtaydıñ bwl äreketterine qarsı qoldanılatın qanday da bir şaralar turalı aytpağan.

Aşığın aytu kerek, Gonkong mäselesine kelgende Britaniya bastap, AQŞ jaqtap, Kanada, Australiya, Jaña Zelandiya sekildi ağılşın elderi qostağan Qıtayğa qarsı qanday da bir eskertu, ayıptau, sankciyalau, t.b. äreketterinen keremettey oñ nätijesi bolğan joq, bolmaytınday. Kerisinşe, Qıtay biligi barğan sayın Gonkongtağı tegeurinin qataytıp, milliondağan demonstrantardıñ narazılıq şarasın basıp tastadı.  Demokratiyan qorğauşı, quattauşı atalmış elder Beyjiñniñ avtoritarlıq jüyesiniñ aldında älsizdik tanıtqanı jasırın emes.

“The Qazaq Times”