Armeniya prem'er-ministri Nikol Paşinyan. Foto: https://rbk.ru

Armeniya prem'er-ministri Nikol Paşinyan Taulı Qarabaqtağı jağdayğa baylanıstı qızmetinen ketuge nietti emes ekenin mälimdedi. Bwl turalı onlayn-konferenciya kezinde ayttı.

Paşinyan sözinde: «Men üşin eldiñ twraqtılığı men qauipsizdigin qamtamasız etu turalı mäsele bar. Basqa mäseleler joq. Bastapqı kezde men üşin beybit twrğındardıñ amandığı mañızdı boldı. Sondıqtan da osınday şeşim qabıldadım. Bwl jağdayğa baylanıstı otstavkağa ketu oyımda joq», – dedi.

Sonımen qatar, Paşinyan respublikanıñ oppoziciyasın halıqtı qarulı küres pen qaqtığıstarğa şaqırmaudı talap etti.

10 qaraşada Äzirbayjan, Armeniya jäne Resey Taulı Karabaqtağı äskeri qimıldardı toqtatu turalı kelisimge qol qoyğan. Uağdalastıq büginnen bastap küşine endi.  Qwjatqa säykes aymaqqa Resey bitimgerleri kirgizilip, Armeniya Äzirbayjanğa 20 qaraşağa deyin Agdam jäne Gazah audanında armyandardıñ qolındağı jerdi qaytarıp beruge kelisti.

Armeniya prem'er-ministri kelisim turalı jariyalay salısımen Erevanda tolqular bastaldı. Ükimet basşısınıñ şeşimine narazılıq tanıtqan jüzdegen adam Erevandağı ükimet üyine basıp kirip, parlament spikerin tepkige jıqtı.

Biıl 27 qırküyekte Taulı Qarabaq üşin qaqtığıs qayta bastalıp, mıñdağan adam qaytıs boldı. Olardıñ arasında beybit twrğındar da bar. Eki tarap üş ret atıstı toqtatu turalı kelisimge kelgenimen, bwl kelisim saqtalmadı.

"The Qazaq Times"