Foto: Därmen Smayıldıñ FB paraqşasınan

13 qaraşa küni äl-Farabi atındağı Qazaq wlttıq universitetiniñ jurnalistika fakul'tetinde belgili baspa isi jäne poligrafiya salasınıñ qayratkeri, bibliograf-ğalım, baspagerlik-redaktorlıq jäne dizaynerlik öner  kafedrasınıñ docenti Qoñır Mwqataevanıñ 70 jıldığına arnalğan «Baspa, poligrafiya jäne web-tehnologiyalar jüyesin oqıtu-zertteu mäseleleri» attı halıqaralıq ğılımi-täjiribelik onlayn konferenciya bolıp ötti. Konferenciya jwmısına tanımal ğalımdar men baspagerler qatıstı.

Ğılımi-täjiribelik konferenciyada bügingi tañdağı baspa isi salasındağı eñ özekti degen mäseleler ortağa salındı. Qazirgi qazaq kitabı, baspalardıñ tağdırı, onı zertteu nısanına aynaldıratın ğılımi-zertteu aynalımınıñ jay-küyi, tehnikalıq-tehnologiyalıq kürdelilikter, kitap saudası, oqırmanğa kitap jetkizu qwndılıqtarı «Baspa, poligrafiya jäne web-tehnologiyalar jüyesin oqıtu-zertteu mäseleleri» attı halıqaralıq ğılımi-täjiribelik onlayn konferenciyasınıñ bastı taqırıbına aynalıp, onı şeşu tetikteri qarastırıldı. Osı saladağı ğalım-wstaz, bibliograf-redaktor Qoñır Mwqatayqızınıñ eñbegi negizgi tiekke alınıp, qayratker twlğanıñ kitap isindegi 45 jıldan astam eñbegi qatısuşılar tarapınan joğarı bağalandı.

İs-şara barısında söz alğan «Arıs» baspasınıñ direktorı Ğarifolla Änes, «Qazığwrt» baspasınıñ direktorı Temirğali Köpbaev, QR Wlttıq memlekettik Kitap palatasınıñ direktorı Ädil Qoytanov, L.Gumilev atındağı Euraziya wlttıq universitetinen jazuşı, baspager-redaktor Twrlıbek Mämeseyit, İ.Jansügirov atındağı Jetisu memlekettik universietiniñ professorı Altın Bakradenova, «Almatıkitap» baspasınıñ bas redaktorı Al'mira Sujikova jäne fakul'tet ğalımdarı qazirgi kitap isindegi ahual töñireginde pikir bildirip, mereytoy iesine öz lebizderi men sıy-siyapattarın tartu etti. Birneşe memlekettik nagradalardıñ iegeri Qoñır Mwqatayqızı «Til janaşırı» tösbelgisimen jäne «QazWU-ğa 85 jıl» qwrmet belgisimen marapattaldı.

Alqalı otırısta biılğı Qazaqstan baspa isiniñ 100 jıldığında Wlttıq baspa künin belgileu mäselesi de kün tärtibine şığarılıp, şığarmaşılıq baspagerlik qızmetti zamanaui bağıtta damıtu jöninde söz boldı. Sonımen qatar, konferenciya barısında jurnalistika fakul'tetin 1999 jılğı bitirgen tülekterdiñ demeuşiligimen aşılğan Studentterge arnalğan oqu-demalıs alañınıñ twsauı kesildi. Bwl «Qayırımdılıq alañınıñ» maqsatı – studentterdiñ kitap oquı men türli aqparattar almasuına jağday jasap, qayırımdılıq pen izgilikti bir-biriniñ boyına siñiru.

Konferenciya soñında baspa, poligrafiya jäne web-tehnologiyalar jüyesin oqıtu-zertteu mäselelerine qatıstı arnayı qarar qabıldandı.

Derekköz: bitik.kz

"The Qazaq Times"