باسپا سالاسىنىڭ باس مامانىنىڭ مەرەيتويى

13 قاراشا كۇنى ءال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىندە بەلگىلى باسپا ءىسى جانە پوليگرافيا سالاسىنىڭ قايراتكەرى، بيبليوگراف-عالىم، باسپاگەرلىك-رەداكتورلىق جانە ديزاينەرلىك ونەر  كافەدراسىنىڭ دوتسەنتى قوڭىر مۇقاتاەۆانىڭ 70 جىلدىعىنا ارنالعان «باسپا، پوليگرافيا جانە web-تەحنولوگيالار جۇيەسىن وقىتۋ-زەرتتەۋ ماسەلەلەرى» اتتى حالىقارالىق عىلىمي-تاجىريبەلىك ونلاين كونفەرەنتسيا بولىپ ءوتتى. كونفەرەنتسيا جۇمىسىنا تانىمال عالىمدار مەن باسپاگەرلەر قاتىستى.

عىلىمي-تاجىريبەلىك كونفەرەنتسيادا بۇگىنگى تاڭداعى باسپا ءىسى سالاسىنداعى ەڭ وزەكتى دەگەن ماسەلەلەر ورتاعا سالىندى. قازىرگى قازاق كىتابى، باسپالاردىڭ تاعدىرى، ونى زەرتتەۋ نىسانىنا اينالدىراتىن عىلىمي-زەرتتەۋ اينالىمىنىڭ جاي-كۇيى، تەحنيكالىق-تەحنولوگيالىق كۇردەلىلىكتەر، كىتاپ ساۋداسى، وقىرمانعا كىتاپ جەتكىزۋ قۇندىلىقتارى «باسپا، پوليگرافيا جانە web-تەحنولوگيالار جۇيەسىن وقىتۋ-زەرتتەۋ ماسەلەلەرى» اتتى حالىقارالىق عىلىمي-تاجىريبەلىك ونلاين كونفەرەنتسياسىنىڭ باستى تاقىرىبىنا اينالىپ، ونى شەشۋ تەتىكتەرى قاراستىرىلدى. وسى سالاداعى عالىم-ۇستاز، بيبليوگراف-رەداكتور قوڭىر مۇقاتايقىزىنىڭ ەڭبەگى نەگىزگى تيەككە الىنىپ، قايراتكەر تۇلعانىڭ كىتاپ ىسىندەگى 45 جىلدان استام ەڭبەگى قاتىسۋشىلار تاراپىنان جوعارى باعالاندى.

ءىس-شارا بارىسىندا ءسوز العان «ارىس» باسپاسىنىڭ ديرەكتورى عاريفوللا انەس، «قازىعۇرت» باسپاسىنىڭ ديرەكتورى تەمىرعالي كوپباەۆ، قر ۇلتتىق مەملەكەتتىك كىتاپ پالاتاسىنىڭ ديرەكتورى ءادىل قويتانوۆ، ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنەن جازۋشى، باسپاگەر-رەداكتور تۇرلىبەك مامەسەيىت، ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيەتىنىڭ پروفەسسورى التىن باكرادەنوۆا، «الماتىكىتاپ» باسپاسىنىڭ باس رەداكتورى الميرا سۋجيكوۆا جانە فاكۋلتەت عالىمدارى قازىرگى كىتاپ ىسىندەگى احۋال توڭىرەگىندە پىكىر ءبىلدىرىپ، مەرەيتوي يەسىنە ءوز لەبىزدەرى مەن سىي-سياپاتتارىن تارتۋ ەتتى. بىرنەشە مەملەكەتتىك ناگرادالاردىڭ يەگەرى قوڭىر مۇقاتايقىزى «ءتىل جاناشىرى» توسبەلگىسىمەن جانە «قازۇۋ-عا 85 جىل» قۇرمەت بەلگىسىمەن ماراپاتتالدى.

القالى وتىرىستا بيىلعى قازاقستان باسپا ءىسىنىڭ 100 جىلدىعىندا ۇلتتىق باسپا كۇنىن بەلگىلەۋ ماسەلەسى دە كۇن تارتىبىنە شىعارىلىپ، شىعارماشىلىق باسپاگەرلىك قىزمەتتى زاماناۋي باعىتتا دامىتۋ جونىندە ءسوز بولدى. سونىمەن قاتار، كونفەرەنتسيا بارىسىندا جۋرناليستيكا فاكۋلتەتىن 1999 جىلعى بىتىرگەن تۇلەكتەردىڭ دەمەۋشىلىگىمەن اشىلعان ستۋدەنتتەرگە ارنالعان وقۋ-دەمالىس الاڭىنىڭ تۇساۋى كەسىلدى. بۇل «قايىرىمدىلىق الاڭىنىڭ» ماقساتى – ستۋدەنتتەردىڭ كىتاپ وقۋى مەن ءتۇرلى اقپاراتتار الماسۋىنا جاعداي جاساپ، قايىرىمدىلىق پەن ىزگىلىكتى ءبىر-ءبىرىنىڭ بويىنا ءسىڭىرۋ.

كونفەرەنتسيا سوڭىندا باسپا، پوليگرافيا جانە web-تەحنولوگيالار جۇيەسىن وقىتۋ-زەرتتەۋ ماسەلەلەرىنە قاتىستى ارنايى قارار قابىلداندى.

دەرەككوز: bitik.kz

"The Qazaq Times"