Körneki suret. Foto: aşıq derekköz

Qazaqstan prezidenti Toqaev Parlamenti Mäjilisi deputattarınıñ jetinşi saylauın jäne aymaqtardağı mäslihattardıñ saylauın tağayındau turalı jarlıqqa qol qoydı. 

Aqordanıñ habarlauınşa, №439 jarlıqta prezident  partiyalıq tizimder boyınşa saylanatın Parlament Mäjilisi deputattarınıñ kezekti saylauın 2021 jılğı 10 qañtarğa belgilegen. Bwl sayasi partiyalar wsınatın 98 orınğa saylau bolatının bildiredi. Al Qazaqstan halqı Assambleyasınan saylanatın 9 deputattıq mandatqa saylau 11 qañtarğa tağayındaldı.

Jalpı jiını Mäjilistegi 107 deputattıñ saylauın ötkizuge ädettegidey Ortalıq saylau komissiyası jauaptı. Sonımen qosa, Ükimet pen aymaq äkimderi sayasi nauqandı «materialdıq-tehnikalıq jäne qarjılıq-wyımdastıruşılıq jağınan» qamtuı qajet.

Prezident qol qoyğan tömengi palata Mäjilistiñ saylauımen qatar, OSK qaulısınıñ negizinde barlıq deñgeydegi mäslihattıñ z mıñnan astam deputatın saylau merzimi bekitildi.

«Aldağı saylau konstituciyalıq merzimge säykes, 2021 jıldıñ 10 qañtarında ötedi. Barlıq sayasi partiyalardıñ bwl saylau nauqanına qatısuğa dayındaluına, saylau aldındağı platformasın äzirleuine, partiyalıq infraqwrılımdardı jetildiruine uaqıtı jetkilikti boldı.

Ortalıq saylau komissiyası men Bas prokuratura saylaudıñ zañdılığın, aşıqtığın jäne ädildigin saqtau üşin twraqtı baqılau jürgizip otıradı», – dep uäde berdi Toqaev jazbaşa ündeuinde.

Ol «jaña saylauğa deyin sayasi jañğıru, köppartiyalıqtı damıtu jäne elimizdiñ qoğamdıq-sayasi  ömirine azamattardıñ qatısu ayasın keñeytu jöninde şaralar qabıldandı» dep sanaydı.

Bwğan alğışart retinde memleket basşısı «QR Parlamenti jäne onıñ deputattarınıñ märtebesi turalı» konstituciyalıq  zañğa jäne «QR Parlamentiniñ komitetteri men komissiyaları turalı» zañğa tüzetuler engizilgenin alğa tartqan. Osı arqılı parlamenttik oppoziciya institutın qwramız deydi. Sonday-aq, jaña erejeler boyınşa «parlamenttik täjiribemizde alğaş ret partiyalıq tizimge äyelder men jastar üşin 30 payızdıq kvota engizildi» delingen. Prezidenttiñ sözinşe, olardıñ elimizdegi qoğamdıq-sayasi üderisterge belsendi qatısuına septigin tigizedi-mis. Öñirlerdegi mäslihattar saylauı «alğaş ret partiyalıq tizim boyınşa» ötedi. Toqaev mwnı «demokratiyalıq täjiribege tolıq say» degen oyda.

Koronavirus pandemiyası men onıñ saldarınan tuğan ekonomikalıq dağdarıstı tilge tiek etken ol köbine eski kadrlerden qayta jasaqtalatın parlament jäne jergilikti ökildi organdardıñ jañartılğan qwramı «eldegi äleumettik-ekonomikalıq reformalardı sapalı äri zañnamalıq twrğıdan qamtamasız etuge basa män beredi» deydi.

Tipti bwl saylau Qazaqstan biliginiñ eldegi sayasi jüyeniñ jañaruın qamtamasız etetin sayasi instituttardı «demokratiyalandıruğa jäne jañğırtuğa asa ıqılastı ekenin tağı da bir däleldeytin boladı» dep söz berdi.

Toqaev resmi ündeuiniñ qorıtındısında barşa azamattı wstanımın belsendi tanıtuğa, Parlament Mäjilisiniñ jäne mäslihattardıñ aldağı saylauına wyımşıldıqpen qatısuğa şaqırğan.

Qazaqstanda altı ret ötken deputattardı saylaudıñ köbinde zañsızdıqtar körinis tapqan. Bıltır ötken prezident saylauında da äkimşilik resurstardıñ küşimen köptegen zañ bwzuşılıqtar äleumettik jelilerde keñinen tarağanına qaramastan, olardıñ eşbiri sotqa jetpegen.

Osıdan eki apta bwrın densaulıq saqtau ministri Aleksey Coy koronavirus indetine baylanıstı saylau onlayn ötui mümkin dep mälimdegen. Al onlayn dauıs beruge qarsı qoğam belsendileri peticiya jariyalap, prezidentten oğan tıyım saludı swrağan. Narazılardıñ pikirinşe, Qazaqstan onlayn dauıs beruge tehnikalıq jağınan da, zañdıq jağınan da dayın emes.

“The Qazaq Times”