Foto: rferl.org

Qazaqstan üşin aumaqtıq twtastıq mäselesi, separatizm probleması özekti. Degenmen köpvektorlı sayasat wstanatın Qazaqstan biligi Äzirbayjan-Armeniya qaqtığısında tarazınıñ basın teñ wstap twr. Äzirbayjan Respublikasınıñ Qazaqstandağı elşisi Raşad Mamedov Äzirbbayjan Armeniyamen äskeri qaqtığıstı şeşu kezinde Qazaqstannıñ moral'dıq jäne sayasi qoldauı qajet dep mälimdedi.

«Biz Qazaqstannıñ halıqaralıq qwqıq talaptarına say moral'dıq, sayasi qoldauına mwqtajbız. BWW Qauipsizdik Keñesiniñ qararı boyınşa Qazaqstan bwl problema territoriyalıq twtastıq, egemendik ayasında Äzirbayjan aumağınan basqınşılıq äskerlerdi şığaru arqılı şeşilui kerek dep aytadı. Degenmen resmi Baku Qazaqstannıñ qoldauına mwqtaj», – dedi Mamedov.

Bwğan deyin Äzirbayjan Qazaqstannan EAEO jäne WQŞW zañdarı ayasında Armeniya tarapınan qaqtığıstı toqtatudı swrağan. Sonday-aq Qazaqstannıñ kömegine mwqtaj ekenin, bwl halıqtıñ beybitşilik pen kelisimde ömir süruiniñ ülgisi ekenin aytqan.

Taulı Qarabaqtağı jağday 27 qırküyekte şielenisip, daulı aumaqta äli künge deyin şayqastar jürip jatır. Äzirbayjan men Armeniyada äskeri jağday engizilgen. Eki tarap qaza tapqandar men jaralanğandardıñ bar ekenin jariyaladı.

Äzirbayjan men Armeniya arasındağı jer dauı 1988 jıldan beri äli künge deyin jalğasıp keledi. Bwl soğıstıñ saldarınan Äzirbayjannıñ 40 mıñğa juıq azamatı qaza tauıp, 1 millionnan astam adamı öz üylerinen bosıp ketken. Europadağı qauipsizdik pen ıntımaqtastıq wyımına qarastı Minsk tobınıñ kömegimen 1994 jılı mamırda Baku men Erevan arasında atıstı toqtatu bitimine qol qoyılğan soñ taraptardıñ qaqtığıstarı birşama azaydı.

Kelisimge qol qoyılğanına qaramastan, jaulasuşı eki eldiñ teketiresi ayaqtalmay, beybit kelissözder nätije bergen joq. 1992 jılı Taulı Qarabaq qayşılığın toqtatu maqsatında Europadağı qauipsizdik pen ıntımaqtastıq wyımına qarastı «Minsk tobı» qwrıldı. AQŞ, Resey men Franciya osı toptı basqarudı öz moyındarına aldı. Minsk tobınıñ basşıları osı künge deyin qarsılasuşı taraptarğa birneşe beybit şeşim jobasın wsınğan. Bwl beybit jobalar är kezde bir nemese eki taraptıñ da qarsılığına wşırap otırdı. Mwnımen bir mezgilde atıstı toqtatu bitimi de orındaluın kepildendiretin qwjattardıñ bolmauına baylanıstı tarptar baylanısı qaytadan bwzılıp otırdı.

"The Qazaq Times"