Prezident Toqaev 29 şilde ükimet qwramımen jiın ötkizdi. Foto: Aqorda

Prezident Toqaev ükimettiñ şeşimin qayta qarap, eldegi karantin rejimin tağı eki aptağa wzartudı tapsırdı.

Bügin prezident indettiñ aujayına baylanıstı mäselelerge arnalğan keñes ötkizdi. Şilde ayında engizilgen şekteu şaraların tiimdiligin arttıru maqsatında, sonday-aq, Qazaqstandağı jäne şekaralas memleketterdegi epidemiologiyalıq jağdaydıñ kürdelene tüsu ıqtimaldığın eskere otırıp, Toqaev Memlekettik komissiyağa karantin şaraların kezeñ-kezeñimen jeñildetu arqılı eki aptağa wzartudı tapsırdı.

«Prem'er-ministr Asqar Mamin prezidentke 5 şildeden bastap elimizde qatañ karantin şaraları engizilgennen keyin indet jwqtıruşılardıñ sanı 29%-ğa tömendegenin bayandadı. Bir künde indet jwqtıratın adamdardıñ sanı 1500-1600 aralığında twraqtağan. Stacionarlardağı emdeluşilerdiñ qatarı 43 payızğa, onıñ işinde, reanimaciyalıq palatalardağı nauqastar sanı 27 payızğa azayğan. Sauığıp şıqqandardıñ sanı 63%-ğa deyin ösken. Jedel-järdem şaqıru jağdayı tömendegen», - delingen osı turalı habarlağan Aqorda saytında.

Densaulıq saqtau ministri Aleksey Coy Toqaevqa infraqwrılım nısandarınıñ epidemiologiyalıq ahualğa jäne ekonomikağa äserin eskere otırıp, karantin şaraların kezeñ-kezeñimen jeñildetu jolın bayandadı. Ministr Coy 28 şilde küngi ükimet otırsında 3 tamızdan bastap-aq karantindi jeñildete beruge bolatının aytıp edi, alayda Aqorda bwğan asıqpauğa şeşim qabıldadı.

Körşi Özbekstan eli de 1 tamızda ayaqtaluı tiis karantin merzimin tamız ayınıñ 15-ine deyin wzartqan.

"The Qazaq Times"