توقاەۆ كارانتيندى جارتى ايعا سوزدى

پرەزيدەنت توقاەۆ ۇكىمەتتىڭ شەشىمىن قايتا قاراپ، ەلدەگى كارانتين رەجيمىن تاعى ەكى اپتاعا ۇزارتۋدى تاپسىردى.

بۇگىن پرەزيدەنت ىندەتتىڭ اۋجايىنا بايلانىستى ماسەلەلەرگە ارنالعان كەڭەس وتكىزدى. شىلدە ايىندا ەنگىزىلگەن شەكتەۋ شارالارىن تيىمدىلىگىن ارتتىرۋ ماقساتىندا، سونداي-اق، قازاقستانداعى جانە شەكارالاس مەملەكەتتەردەگى ەپيدەميولوگيالىق جاعدايدىڭ كۇردەلەنە ءتۇسۋ ىقتيمالدىعىن ەسكەرە وتىرىپ، توقاەۆ مەملەكەتتىك كوميسسياعا كارانتين شارالارىن كەزەڭ-كەزەڭىمەن جەڭىلدەتۋ ارقىلى ەكى اپتاعا ۇزارتۋدى تاپسىردى.

«پرەمەر-مينيستر اسقار مامين پرەزيدەنتكە 5 شىلدەدەن باستاپ ەلىمىزدە قاتاڭ كارانتين شارالارى ەنگىزىلگەننەن كەيىن ىندەت جۇقتىرۋشىلاردىڭ سانى 29%-عا تومەندەگەنىن باياندادى. ءبىر كۇندە ىندەت جۇقتىراتىن ادامداردىڭ سانى 1500-1600 ارالىعىندا تۇراقتاعان. ستاتسيونارلارداعى ەمدەلۋشىلەردىڭ قاتارى 43 پايىزعا، ونىڭ ىشىندە، رەانيماتسيالىق پالاتالارداعى ناۋقاستار سانى 27 پايىزعا ازايعان. ساۋىعىپ شىققانداردىڭ سانى 63%-عا دەيىن وسكەن. جەدەل-جاردەم شاقىرۋ جاعدايى تومەندەگەن»، - دەلىنگەن وسى تۋرالى حابارلاعان اقوردا سايتىندا.

دەنساۋلىق ساقتاۋ ءمينيسترى الەكسەي تسوي توقاەۆقا ينفراقۇرىلىم نىساندارىنىڭ ەپيدەميولوگيالىق احۋالعا جانە ەكونوميكاعا اسەرىن ەسكەرە وتىرىپ، كارانتين شارالارىن كەزەڭ-كەزەڭىمەن جەڭىلدەتۋ جولىن باياندادى. مينيستر تسوي 28 شىلدە كۇنگى ۇكىمەت وتىرسىندا 3 تامىزدان باستاپ-اق كارانتيندى جەڭىلدەتە بەرۋگە بولاتىنىن ايتىپ ەدى، الايدا اقوردا بۇعان اسىقپاۋعا شەشىم قابىلدادى.

كورشى وزبەكستان ەلى دە 1 تامىزدا اياقتالۋى ءتيىس كارانتين مەرزىمىن تامىز ايىنىڭ 15-ىنە دەيىن ۇزارتقان.

"The Qazaq Times"