"Ruzvel't" wşaq tasımaldauşı kemesi Qıtayğa jaqın twr. Foto: M

Jeksenbide halıqaralıq ıqpaldı aqparat agenttikteri AQŞ-tıñ wşaq tasımaldauşı üş birdey alıp kemesi men onıñ şabuılşı jäne joyğış kemeler qosınınıñ Ündi-Tınıq mwhitında jüzip jürgenin jarısa jazdı. AQŞ-tıñ joğarı soğıs quatına ie bwnday kemeler qosınınıñ Qıtayğa jaqın teñiz sularına bir uaqıtta jinaluı tım sirek boladı.

Sarapşılardıñ aytuınşa, AQŞ-Qıtay şielenisi kezinde bwl qadam Qıtayğa äskeri eskertu qatarında qabıldanadı jäne AQŞ teñiz küşteriniñ epidemiyanıñ zardaptarına qarsı twra alğanın bildiredi. AQŞ-tıñ küşti äskeri eskertui AQŞ-Qıtay qatınası birneşe faktorlarğa baylanıstı şielenisip jatqan twsta jasalıp otır. Bwl turalı köpşilikke belgili, qısqaşa aytqanda koronavirusqa baylanıstı dau men Gonkong mäselesi.

Eki mäsele boyınşa da Beyjiñ men Uaşingtonnıñ közqarası qayşı. Beyjiñ tarabı koronavirus emidemiyasınıñ taraluına qatıstı halıqaralıq tekseristen bas tarttı. Al, Gonkong isin Qıtaydıñ egemendik işindegi mäselesi, oğan AQŞ-tıñ aralasu qwqığı joq dep mälimdegen.

Associated Press agenttigi AQŞ-tıñ özge de ondağan kemesi atalğan aymaqta jürgenin habarlardı. Qwrama Ştattardıñ aymaqtağı äskeri qolbasşılarınıñ mälimetinşe, bwl aymaqtıñ twraqtılığı men ondağı odaqtastarına degen AQŞ tarabınıñ jauapkerşiligin körsetedi.

«Assoşieyted Presske» bergen swhbatında AQŞ Ündi-Tınıq mwhitı qolbasşılığınıñ operaciyalar jönindegi direktorı general-mayor Stiven Kieler äskeri küşti äygileu – bwl kezekti ärekettiñ bir böligi ğana ekenin, AQŞ-tıñ wşaq tasımaldauşı kemeleri men onıñ soqqı beru tobınıñ jinaqtaluı küşti soğıs quatın da äygileytinin eskertti.

“The Qazaq Times”