Halıqtıñ «közi, qwlağı häm tili» BAQ-tıñ cenzurası. Foto: amerikalıq suretşi Eric Drooker

Bügin, 3 mamır Düniejüzilik baspasöz bostandığı küni qarsañında halıqaralıq «Ädil söz» söz bostandığın qorğau wyımı biılğı birinşi toqsandıqtıñ esebin jariyaladı.

Qañtar jäne naurız ayı aralığında wyım jurnalisterge jasalğan üş şabuıl, 13 wstau (beseui oqiğadan habar taratu kezinde bolğan) tirkegen. "Ädil sözdiñ" aytuınşa, jurnalister men özge de azamattarğa azamattıq tärtipte "söz bostandığı qwqığın jüzege asırğanı üşin" 22 ayıp tağılğan. 17-i "ar-namıs jäne iskerlik bedeldi qorğaumen" baylanıstı. Altı şağımdı - memlekettik qızmetkerler, altauın wyımdar men kompaniyalar tüsirgen.

Qor sonımen birge aqparat alu jäne taratu qwqığın bwzu boyınşa 82 fakt tirkegen. Olardıñ arasında qoğamdıq mañızdı aqparat beruden bas tartu nemese şekteu boyınşa 60 fakt bar.

Bwğan qosa "Ädil söz" mälimetinşe, aqparat qwraldarına qılmıstıq ister boyınşa 14 ayıp tağılğan. Altauı - "jala jabu", törteui "jalğan aqparat taratu" isimen baylanıstı.

Qwqıq qorğau wyımınıñ mälimetinşe, Qazaqstanda koronavirusqa baylanıstı 16 naurızda tötenşe jağday jariyalanğannan keyin aqparat qwraldarı, blogerler men özge azamattarğa qısım üdegen. Bwğan deyin "Şekarasız tilşiler" wyımı bilikti indet jaylı aqparat taratqan jurnalister men blogerlerdi qudalaudı toqtatuğa şaqırğan.

Onıñ aldında halıqaralıq jäne jergilikti qwqıq qorğauşılar Qazaqstan biligin tötenşe jağdaydı pikirin aşıq aytqan belsendilerdi qudalau qwralı retinde paydalanbauğa şaqırğan.

"Şekarasız tilşiler" wyımınıñ 21 säuirde jariyalanğan "Düniejüzilik baspasöz erkindigi indeksinde" Qazaqstan 180 eldiñ arasında 157 orında twr.

"The Qazaq Times"