Foto: zakon.kz

Belgili mecenat, qoğam belsendisi Marğwlan Seysembay öziniñ Feysbuk jelisinde özine qauip tönui mümkin ekendigin jazdı.  Bwğan deyin eldegi qoğam belsendileri türli ayıppen qamauğa alınğan bolatın.

Ol jazbasında: «Dostar, meniñ izime tüskenge wqsaydı. Soñğı birneşe kün boyı Alel' Agro qızmetkerleriniñ tınıştığı qaştı. Keşe tünde Alel' Agro basşılığın twtqınğa aldı. Küni boyı bankterden qwjattarın aldırtıp, üylerinde tintu jürgizdi.
Mümkindigimdi paydalanıp, men eşqanday da qılmıs jasamağanımdı aytqım keledi. Bir de bir bizneste men eşnärsege qol qoyıp, bolmasa basşılıq etpedim. Qazir olar Alel' Agroğa qatıstı subsidiyalar alu kezinde alayaqtıq pen qarjı jımqıru boyınşa qılmıstıq is qozğap otır. Alel' Agro ayıp tağılatınday investiciyalıq subsidiyalar alğan emes. Meniñ bwl subsidiyalardıñ ülestirilui, ne alınuına eşqanday qatısım bolmağan, qazir de eş qatısım joq. Sondıqtan, bwl nağız sayasi is, olar meni qamap tastamaqşı nemese auızımdı japtırğısı kelip otır.
⠀
P.S. Meniñ üyimniñ aynalasında 30-40 şaqtı adam jür. Şaması komitetçikter», – degen.

Bwğan deyin ol belgili jurnalist, Wlttıq qoğamdıq senim keñesiniñ bwrınğı müşesi, qoğam belsendisi Arman Şoraevtıñ “tötenşe jağday kezinde jalğan aqparat tarattı” degen küdikpen wstalğanına baylanıstı «Arman Şoraevtı Almatığa äkele jatır. Bügin keşke onıñ qwqıqtarına uaqıtşa şekteu qoyu şaraların belgileu boyınşa sot ötedi. Eger oğan da Älnwr Il'yaşevke jasağanday, birden eki ayğa abaqtığa jabu şarası qoldanılsa, soñğı künderi belsendilerdi twtqınğa alu äreketteriniñ barlığın eskersek, bilik basıp-janıştau jolın tañdağanı jäne eşqanday da reformalarğa ümit artudıñ mäni de joq ekeniniñ ayqın belgisi bolmaq. Qoğamnıñ qordalanıp qalğan mäselelerin beybit jäne evolyuciyalıq twrğıda şeşudiñ tağı da bir mümkindiginen ayırılsaq, öte ökinişti bolmaq. Bilik öz tañdauın jasap jatır. Arman, sen mıqtısıñ, öz-öziñe berik bol! Alla seniñ jäne bizdiñ osı sınnan da aman ötuimizdi jazsın!», – dep jazğan bolatın.

Esteriñizge sala ketsek Marğwlan Seysembay 1966 jılı Jezqazğan oblısında düniege kelgen. Qazaqstandıq «Al'yans Bank» AQ-nıñ Direktorlar Keñesiniñ törağası, reseylik «StarBank» JAQ-tıñ baqılauşı akcioneri, «Seymar» kompaniyasınıñ negizin qalauşı,  Qazaqstan Respublikası Şahmat federaciyasınıñ prezidenti, "Seimar Social Fund" kommerciyalıq emes qayırımdılıq qorınıñ qwrıltayşısı, Qazaqstandağı "Heileyberry School Almaty" jekemenşik ağılşın mektebiniñ qwrıltayşısı sındı qızmetter atqarğan.

"The Qazaq Times"