مارعۇلان سەيسەمباي: ولار مەنى قاماپ تاستاماقشى

بەلگىلى مەتسەنات، قوعام بەلسەندىسى مارعۇلان سەيسەمباي ءوزىنىڭ فەيسبۋك جەلىسىندە وزىنە قاۋىپ ءتونۋى مۇمكىن ەكەندىگىن جازدى.  بۇعان دەيىن ەلدەگى قوعام بەلسەندىلەرى ءتۇرلى ايىپپەن قاماۋعا الىنعان بولاتىن.

ول جازباسىندا: «دوستار، مەنىڭ ىزىمە تۇسكەنگە ۇقسايدى. سوڭعى بىرنەشە كۇن بويى الەل اگرو قىزمەتكەرلەرىنىڭ تىنىشتىعى قاشتى. كەشە تۇندە الەل اگرو باسشىلىعىن تۇتقىنعا الدى. كۇنى بويى بانكتەردەن قۇجاتتارىن الدىرتىپ، ۇيلەرىندە ءتىنتۋ جۇرگىزدى.
مۇمكىندىگىمدى پايدالانىپ، مەن ەشقانداي دا قىلمىس جاساماعانىمدى ايتقىم كەلەدى. ءبىر دە ءبىر بيزنەستە مەن ەشنارسەگە قول قويىپ، بولماسا باسشىلىق ەتپەدىم. قازىر ولار الەل اگروعا قاتىستى سۋبسيديالار الۋ كەزىندە الاياقتىق پەن قارجى جىمقىرۋ بويىنشا قىلمىستىق ءىس قوزعاپ وتىر. الەل اگرو ايىپ تاعىلاتىنداي ينۆەستيتسيالىق سۋبسيديالار العان ەمەس. مەنىڭ بۇل سۋبسيديالاردىڭ ۇلەستىرىلۋى، نە الىنۋىنا ەشقانداي قاتىسىم بولماعان، قازىر دە ەش قاتىسىم جوق. سوندىقتان، بۇل ناعىز ساياسي ءىس، ولار مەنى قاماپ تاستاماقشى نەمەسە اۋىزىمدى جاپتىرعىسى كەلىپ وتىر.
⠀
P.S. مەنىڭ ءۇيىمنىڭ اينالاسىندا 30-40 شاقتى ادام ءجۇر. شاماسى كوميتەتچيكتەر»، – دەگەن.

بۇعان دەيىن ول بەلگىلى جۋرناليست، ۇلتتىق قوعامدىق سەنىم كەڭەسىنىڭ بۇرىنعى مۇشەسى، قوعام بەلسەندىسى ارمان شوراەۆتىڭ “توتەنشە جاعداي كەزىندە جالعان اقپارات تاراتتى” دەگەن كۇدىكپەن ۇستالعانىنا بايلانىستى «ارمان شوراەۆتى الماتىعا اكەلە جاتىر. بۇگىن كەشكە ونىڭ قۇقىقتارىنا ۋاقىتشا شەكتەۋ قويۋ شارالارىن بەلگىلەۋ بويىنشا سوت وتەدى. ەگەر وعان دا ءالنۇر يلياشەۆكە جاساعانداي، بىردەن ەكى ايعا اباقتىعا جابۋ شاراسى قولدانىلسا، سوڭعى كۇندەرى بەلسەندىلەردى تۇتقىنعا الۋ ارەكەتتەرىنىڭ بارلىعىن ەسكەرسەك، بيلىك باسىپ-جانىشتاۋ جولىن تاڭداعانى جانە ەشقانداي دا رەفورمالارعا ءۇمىت ارتۋدىڭ ءمانى دە جوق ەكەنىنىڭ ايقىن بەلگىسى بولماق. قوعامنىڭ قوردالانىپ قالعان ماسەلەلەرىن بەيءبىت جانە ەۆوليۋتسيالىق تۇرعىدا شەشۋدىڭ تاعى دا ءبىر مۇمكىندىگىنەن ايىرىلساق، وتە وكىنىشتى بولماق. بيلىك ءوز تاڭداۋىن جاساپ جاتىر. ارمان، سەن مىقتىسىڭ، ءوز-وزىڭە بەرىك بول! اللا سەنىڭ جانە ءبىزدىڭ وسى سىننان دا امان ءوتۋىمىزدى جازسىن!»، – دەپ جازعان بولاتىن.

ەستەرىڭىزگە سالا كەتسەك مارعۇلان سەيسەمباي 1966 جىلى جەزقازعان وبلىسىندا دۇنيەگە كەلگەن. قازاقستاندىق «اليانس بانك» اق-نىڭ ديرەكتورلار كەڭەسىنىڭ توراعاسى، رەسەيلىك «ستاربانك» جاق-تىڭ باقىلاۋشى اكتسيونەرى، «سەيمار» كومپانياسىنىڭ نەگىزىن قالاۋشى،  قازاقستان رەسپۋبليكاسى شاحمات فەدەراتسياسىنىڭ پرەزيدەنتى، "Seimar Social Fund" كوممەرتسيالىق ەمەس قايىرىمدىلىق قورىنىڭ قۇرىلتايشىسى، قازاقستانداعى "Heileyberry School Almaty" جەكەمەنشىك اعىلشىن مەكتەبىنىڭ قۇرىلتايشىسى سىندى قىزمەتتەر اتقارعان.

"The Qazaq Times"