QR Aqparat jäne qoğamdıq damu ministri Däuren Abaev koronaviruspen küreske qanşa qarjı jwmsalatını jäne qanday maqsatqa bağıttalğanı jaylı mälimdeme jasadı.

Koronaviruspen küreske tikeley bölingen qarjı mälimetine toqtalğan ministr, «bwl twrğıda Prezident jariyalağan dağdarısqa qarsı şarlarğa qatıstı emes. Koronavirusqa qarsı küres şaralarına qarjı Ükimet rezervinen üş ret bölindi», - dedi.

Osı orayda 29 qañtardağı birinşi tranş ayasında 1 mlrd 609 mln teñge, 21 aqpanda qosımşa 428 mln 227 mıñ teñge bölindi. Sonday-aq üşinşi ret 25 naurızda 21 mlrd 430 mln teñge bağıttaldı. Bwl qarjı därilik zattardı, medicinalıq jabdıqtar men zerthanalıq qwraldardı aluğa, sonımen qatar medicinalıq maska men qolğap, qorğanıs kiimderi men testilerge bölindi.

Mwnımen qosa, bwl şığındar azamattardı evakuaciyalauğa, şwğıl medicinalıq kömekke, dezinfekciya zattarın aluğa jäne basqa da qajetti şaralarğa negizdeldi. «Koronaviruspen küreske jwmıldırılğan medicinalıq qızmetkerlerge üsteme tölem jasau maqsatında byudjetti naqtılauğa ötinim jeke engizildi», - dedi D. Abaev.

Ayta keteyik, Qazaqstanda koronavirus jwqtırğandar sanı 386 adam boldı. 1 säuirde Qarağandıda bir adam virustan köz jwmdı. 26 adam dertten ayıqtı. Üş adam Covid-19 dertinen qaytıs boldı. Al älem boyınşa qauipti dertke şaldıqqandar sanı 1 millionğa juıqtağan.

"The Qazaq Times"