Artında 6 balası qalğan marqwm Dulat Ağadilovtiñ qazasın ädil tergeudi jäne 22 aqpan wstalğan belsendilerdi dereu bosatudı talap etken almatılıqtar Gandi sayabağında miting ötkizip twr. Almatı qalası. 26 aqpan 2020 jıl. Foto: QT

Almatı qalasında bügin tüsten keyin qalalıq prokuraturanıñ mañında 80 şaqtı belsendi narazılıqqa jinaldı.

Olar keşe ğana astana izolyatorında qaytıs bolğan belsendi Dulat Ağadilovtiñ qazasına oray qayta jinaldı. Almatılıq narazı jwrttıñ arasında sayasatker Baltaş Twrsımbaev,  Hasen Qoja-Ahmet pen Dempartiya bastamaşıl tobınıñ jetekşisi Janbolat Mamay söz söyledi.  Qalalıq prokuratura ğimaratınıñ aldındağı köpşilik qoğamdıq baqılau arqılı täuelsiz komissiya qwrıluın talap etedi. Jinalğandarğa äkimdik ökili şerudiñ zañsız ekenin eskertti. Olardı arnayı jasaq pen policiya sırttay baqılap twr.

Prokuror halıqtıñ aldına şıqsın degen belsendilerge prokurordıñ baspasöz hatşısı «men şığıp türmin, biz qabıldaymız» dep ağınan jarıldı. Biraq resmi ökildiñ wsınısımen kelispegen narazılar marqwm belsendiniñ ölimin tergeudi ädil jürgizudi jäne soñğı mitingte wstalğan, qazir qamauda otırğan belsendilerdi bosatudı talap etip jatır. Janbolat Mamay men özge de azamattar «qamaudağılar bosatılmayınşa taramaymız» deydi.

Şeru barısınan. Almatı qalası. 26 aqpan 2020 jıl. Foto: QT

Marqwm Ağadilovti bwrın soñdı «jürek talmasımen» auırmağanın aytqan belsendiler keşe astanada, Almatı jäne Şımkent qalasında narazılıqqa şıqqan. Elordada eluge juıq belsendini policiya departamenti bastığınıñ birinşi orınbasarı Baqıtjan Malıbaev bastağan jasaq tört avtobusqa  küşpen tiep alıp ketken edi. Al Almatıdağı Celinnıy kinoteatrınıñ mañına jinalğan 50-60 şaqtı belsendi prezident Qasım-Jomart Toqaev, qala prokurorı Bauırjan Jürekbaev men işki ister ministri Erlan Twrğımbaevtıñ atına talap arız jazıp, BAQ arqılı resmi türde jauap beruin swrağan bolatın.

Policiya departamenti baspasöz qızmetiniñ jazuınşa «biıl qañtar ayında Dulat Ağadilge ayıp tağılıp, «eşqayda ketpeu» turalı şara qoldanılğan. Tergeuge kelmegenine baylanıstı sot şeşimimen 24 aqpanda qamauğa alınğan».

Qwzırlı organdar 25 aqpan keşkisin ötken brifingte azamattıq qwqıq pen demokratiyalıq qwndılıqtardıñ orındaluın talap ete jürip birneşe ret sottalğan belsendi Ağadilov öliminiñ sebebin «jürek qan tamırlarınıñ jetispeuşiligi» dep atadı.

*TİKELEY EFIRDİ MINA SİLTEMEDEN KÖRE ALASIZ.

"The Qazaq Times"