الماتىداعى گاندي كوشەسىنىڭ بويىندا اعادىلوۆتىڭ قازاسىنا بايلانىستى شەرۋ ءوتىپ جاتىر (تىكەلەي ەفير)

الماتى قالاسىندا بۇگىن تۇستەن كەيىن قالالىق پروكۋراتۋرانىڭ ماڭىندا 80 شاقتى بەلسەندى نارازىلىققا جينالدى.

ولار كەشە عانا استانا يزولياتورىندا قايتىس بولعان بەلسەندى دۋلات اعادىلوۆتىڭ قازاسىنا وراي قايتا جينالدى. الماتىلىق نارازى جۇرتتىڭ اراسىندا ساياساتكەر بالتاش تۇرسىمباەۆ،  حاسەن قوجا-احمەت پەن دەمپارتيا باستاماشىل توبىنىڭ جەتەكشىسى جانبولات ماماي ءسوز سويلەدى.  قالالىق پروكۋراتۋرا عيماراتىنىڭ الدىنداعى كوپشىلىك قوعامدىق باقىلاۋ ارقىلى تاۋەلسىز كوميسسيا قۇرىلۋىن تالاپ ەتەدى. جينالعاندارعا اكىمدىك وكىلى شەرۋدىڭ زاڭسىز ەكەنىن ەسكەرتتى. ولاردى ارنايى جاساق پەن پوليتسيا سىرتتاي باقىلاپ تۇر.

پروكۋرور حالىقتىڭ الدىنا شىقسىن دەگەن بەلسەندىلەرگە پروكۋروردىڭ ءباسپاسوز حاتشىسى «مەن شىعىپ ءتۇرمىن، ءبىز قابىلدايمىز» دەپ اعىنان جارىلدى. بىراق رەسمي وكىلدىڭ ۇسىنىسىمەن كەلىسپەگەن نارازىلار مارقۇم بەلسەندىنىڭ ءولىمىن تەرگەۋدى ءادىل جۇرگىزۋدى جانە سوڭعى ميتينگتە ۇستالعان، قازىر قاماۋدا وتىرعان بەلسەندىلەردى بوساتۋدى تالاپ ەتىپ جاتىر. جانبولات ماماي مەن وزگە دە ازاماتتار «قاماۋداعىلار بوساتىلمايىنشا تارامايمىز» دەيدى.

شەرۋ بارىسىنان. الماتى قالاسى. 26 اقپان 2020 جىل. فوتو: QT

مارقۇم اعادىلوۆتى بۇرىن سوڭدى «جۇرەك تالماسىمەن» اۋىرماعانىن ايتقان بەلسەندىلەر كەشە استانادا، الماتى جانە شىمكەنت قالاسىندا نارازىلىققا شىققان. ەلوردادا ەلۋگە جۋىق بەلسەندىنى پوليتسيا دەپارتامەنتى باستىعىنىڭ ءبىرىنشى ورىنباسارى باقىتجان مالىباەۆ باستاعان جاساق ءتورت اۆتوبۋسقا  كۇشپەن تيەپ الىپ كەتكەن ەدى. ال الماتىداعى تسەليننىي كينوتەاترىنىڭ ماڭىنا جينالعان 50-60 شاقتى بەلسەندى پرەزيدەنت قاسىم-جومارت توقاەۆ، قالا پروكۋرورى باۋىرجان جۇرەكباەۆ مەن ىشكى ىستەر ءمينيسترى ەرلان تۇرعىمباەۆتىڭ اتىنا تالاپ ارىز جازىپ, باق ارقىلى رەسمي تۇردە جاۋاپ بەرۋىن سۇراعان بولاتىن.

پوليتسيا دەپارتامەنتى ءباسپاسوز قىزمەتىنىڭ جازۋىنشا «بيىل قاڭتار ايىندا دۋلات اعادىلگە ايىپ تاعىلىپ، «ەشقايدا كەتپەۋ» تۋرالى شارا قولدانىلعان. تەرگەۋگە كەلمەگەنىنە بايلانىستى سوت شەشىمىمەن 24 اقپاندا قاماۋعا الىنعان».

قۇزىرلى ورگاندار 25 اقپان كەشكىسىن وتكەن بريفينگتە ازاماتتىق قۇقىق پەن دەموكراتيالىق قۇندىلىقتاردىڭ ورىندالۋىن تالاپ ەتە ءجۇرىپ بىرنەشە رەت سوتتالعان بەلسەندى اعادىلوۆ ءولىمىنىڭ سەبەبىن «جۇرەك قان تامىرلارىنىڭ جەتىسپەۋشىلىگى» دەپ اتادى.

*تىكەلەي ەفيردى مىنا سىلتەمەدەن كورە الاسىز.

"The Qazaq Times"