Mügedek arbasında otırğan Erik Jwmabaev arnayı jasaq ökilderine «şınayı zayırlı qoğam» boludıñ jolın tüsindirude. Almatı qalası. 22 aqpan 2020 jıl. Foto: QT

Älemdik adam haqı qozğalısı Amnesty International  halıqaralıq qwqıq qorğau wyımı 22 aqpan Qazaqstan biliginiñ köpe-körneu wstau äreketi jaylı mälimdeme jasap, äkimşilik jüyeni senbidegi beybit miting kezinde qamalğan azamattardı dereu bosatuğa şaqırdı.  

Ştab päteri Londonda ornalasqan wyımnıñ dereginşe, 22 aqpan tañerteñ Almatıda oppoziciyalıq partiyanı tirkeudi, bilikke sın aytqandardı qudalaudı toqtatudı talap etken 70-ke tarta adam wstalğan.

Amnesty International wyımınıñ Şığıs Europa jäne Ortalıq Aziya boyınşa direktorınıñ orınbasarı Denis Krivoşeev «Qazaqstandağı adam qwqığı jağdayı bwrın da naşar edi. Endi tipti naşarlay tüsti. Bilikke sın aytqandardan osınşama qorqıp, olardı qudalau ükimettiñ söz bostandığınan qanşalıqtı şoşitının körsetedi», – dedi.

Krivoşeev mälimdemesinde «Demokratiyalıq partiya» qwrudı közdeytin bastamaşıl top «bilik tarapınan jasalğan qudalau men qısımnan soñ» senbige josparlanğan qwrıltay s'ezden bas tartqan.

«Dempartiyanı jäne basqa oppoziciyalıq toptardı qoldağanı üşin wstalğandardı bosatuğa şaqıramız. Qazaqstanda payda bolıp jatqan oppoziciyalıq toptardı quğındau – masqara, wyat jağday (These attempts to crush Kazakhstan’s nascent opposition movement are shameful– halıqaralıq wyım mälimdemesinen). Sayasi partiya qwru – adam qwqığınıñ, söz bostandığınıñ, beybit mitingige şığudıñ negizi. Qazaqstan biligi adam qwqıqtarın saqtap, oppoziciyanı qoldağandardı ya narazılıqqa şığıp wstalğandardı bosatuı tiis» delingen resmi habarlamada.

22 aqpan Almatı, Şımkent, Taraz, Aqtöbe qalaları jäne astanada miting ötedi dep belgilengen jerge kelgen belsendilerdi policiya küştep wstap äketti. Jer-jerde wstalğandar «Şal, ket!», «Oyan, Qazaqstan!», «Nazarbaev ketsin! Dariğa ketsin!»  dep wrandattı. Şımkenttegi Täuelsizdik sayabağında küzet küşeytilip, 20-dan astam adamdı policiya äketken. Tarazda da ortalıq köşelerde arnayı jasaq jwmıldırıldı. Aqtöbe men astanada policiya kem degende on adamdı äketti. Miting josparlanğan aymaqtarda ğalamtor jwmısı naşarlağan. Äzirge İİM wstalğandar turalı resmi mälimdeme jasağan joq. Dese de wstalğan azamattardıñ derekqorın äzirlep, izolyatorğa as-suın jetkizip jürgen qwqıq qorğauşılar şamamen 300-dey adam qamalğan deydi.

"The Qazaq Times"