Keñqiyaq jwmısşıları talabı orındalatını turalı habardı estigen soñ. Foto: äleumettik jeli

Keşe, 20 aqpan Aqtöbe öñirindegi mwnaymen aynalısatın «M-Tehservis» kompaniyasınıñ jwmısşıları ötkizgen narazılıqtan soñ jalaqı 15-33 payız aralığında köbeyetini habarlandı.  

«Biz 21 aqpannan bastap jwmısqa qayta kiristik» depti «M-Tehservis» kompaniyasınıñ operatorı Qarjau Qaliev Azattıqqa.

Altınşı razryadı bar operator osığan deyin ay sayın 180-200 mıñ teñge jalaqı alıp jürgen.

- Jasım 61-de. Balalarım ayaqtandı. Sonıñ özinde jalaqım as-sudan artılmay, qinalıp jürdim. Balalı-şağalı, päterlerin nesiege alğan janımdağı jas jigitter menen beter qinalatın. Osı sebepti keşe keniştegi jwmıstı toqtatuğa mäjbür boldıq. Wzaqqa sozılğan kelissözderden soñ jalaqımız köbeyetin boldı. Kompaniya basşıları narazılıq tanıtqan jwmısşılardı qudalamauğa uäde berdi, – deydi Qarjau Qaliev.

Jwmısşılar narazılığınan soñ «M-Tehservis» kompaniyasında jalaqı 15-33 payız aralığında köbeyetinin Aqtöbe oblısı äkiminiñ orınbasarı Qayrat Bekenov te rastap otır. 1 aqpannan bastap «M-Tehservis» kompaniyasınıñ keñsede otıratın qızmetkerleriniñ jalaqısına - 15 payız, kenişte auır jwmıs isteytin jwmısşılar jalaqısı 33 payız qosıladı.

Qayrat Bekenovtiñ sözinşe, ol 20 aqpan küni keşkilik Keñqiyaqtağı kenişke barıp, narazı jwmısşılarmen kezdesken. Keñqiyaqqa jetkenşe jol boyı «M-Tehservis» kompaniyasınıñ Qıtaydağı qwrıltayşılarımen telefonmen kelissöz jürgizip, jwmısşılar talabın jetkizgen.

- «M-Tehservis» mwnay öndirmeydi. Servistik qızmet körsetetin kompaniya. Ekonomikalıq mümkindikteri şekteuli bolğandıqtan kompaniya jwmısşılar talabın birden orınday almağan. Osıdan keyin oblıs basşısı Oñdasın Orazalin «M-Tehservis» kompaniyasına tapsırıs beruşi iri öndiris «SNPS-Aqtöbemwnaygaz» akcionerlik qoğamımen kelissöz jürgizip, 2020 jılğı naurız ayınan bastap tariftik jospardı 8-10 payızğa ösiruge qol jetkizdi. YAğni, servistik qızmetke tölenetin tarifti köbeytu arqılı jwmısşılar talabın orındau mümkin bolıp otır-deydi Qayrat Bekenov.

Beysenbi yağni, 20 aqpanda Aqtöbe oblısı Keñqiyaq kenişinde "M-Tehservis" kompaniyasınıñ eluge tarta jwmısşısı tañerteñnen bastap jwmısqa şıqpay, jalaqını 33 payızğa deyin köbeytudi talap etken bolatın. Jwmısşılar narazılıq akciyasın ötkizbey twrıp, kompaniyanıñ käsipodaq komiteti men basşılarına özderiniñ talaptarın jetkizgen. Biraq mäsele şeşilmegen.

«M-Tehservis» kompaniyası - 2003 jılı Aqtöbe qalasında tirkelgen qıtaylıq mekeme. Ol «Mañğıstaumwnaygaz» igerip jatqan Mañğıstau oblısındağı Bozaşı jäne Jetibay, «SNPS-Aqtöbemwnaygaz» kompaniyasınıñ Keñqiyaq kenişindegi mwnay wñğımaların jöndeu boyınşa qızmet körsetedi. Onda 500-ge juıq adam eñbek etedi.

"The Qazaq Times"