Keşe, aqpannıñ 11-i, eldi eleñdetken Qorday qaqtığısınan keyin törtinşi küni eks-prezident Nazarbaev qazaq-düngen janjalı turalı pikir bildirdi.

Apta basında birqatar auıs-tüyis jasağan auıspaytın törağa Qauipsizdik keñesiniñ jiınında:

– Qazirgi jağday meni qattı alañdatıp otır. 30 jıldıñ işinde halqımızben birge birtalay qiındıqtardı bastan ötkerdik. Qazirgi jastar sol auırtpalıqtardı elestete de almaydı. Qazaqstanda 130 käsiporın jabılıp, 2,5 million adam jwmıssız qaldı. Üylerde jılu joq, azıq-tülik tapşılığı tuındadı. Biz osı sınaqtardıñ bärinen birge öttik, - dedi.

Nazarbaev "köpwlttı halqımızdı biriktirip, twraqtılıqtı qamtamasız ete almasaq, büginde elimizge şeteldik investiciya kelmey, ekonomika twralap qaluşı edi" dep mälimdedi.
Ol "Qazaqstan halqı assambleyası eldegi mwnday jağdaylardı aldın alıp, baqılauda wstauı kerek" dep sanaydı.
Ötken jwma küni keşkisin Jambıl oblısı Qorday audanında qazaq-düngen qaqtığısı bolıp, saldarınan 10 adam qaza tauıp, 19 policey men 40-tan astam twrğın jaralanıp edi.
Sarapşılar men azamattıq belsendiniñ köbi bolğan jağdayğa "bilik kinäli" ekenin aytıp, mwnıñ tübi jıldar boyı qordalanıp, nazar audarılmağan äleumettik teñsizdik, wlttıq teñsizdik jäne jemqorlıq mäselesimen baylanıstıradı.

“The Qazaq Times”