AQŞ ökilder palatası Qıtay biligin ayıptadı. Foto: ChinaFile.

Qıtaydıñ Uhan qalasınan qauipti jaña indet tarağanına eki aydan astam uaqıt ötkende AQŞ-tıñ Ökilder palatası virusqa qatıstı mäseleler boyınşa alğaşqı talqı otırısın ötkizdi. Birqatar zañ şığaruşılar Beyjiñ biligi Qıtaydağı naqtı jağdaydı jasırıp otır dep kümändanatının bildirdi jäne Düniejüzilik densaulıq saqtau wyımı öziniñ senimi men rölin joğaltıp qoyğanın ayttı.

Jaña koronavirus Qıtayda qarqındı tarap jatqanı belgili. Qazir qauipti virus Qıtaydıñ barlıq provinciyaları men avtonomiyalı aymaqtarına tarap ülgirgen. Resmi mälimet boyınşa, qazirge deyin 28 mıñ adam jwqtırıp, 560-tan astam adam köz jwmğan. Sonday-aq, älemniñ 20-dan astam eline taraldı. AQŞ-tıñ Viskonsin ştatında seysenbide jaña koronavirusqa şaldıqqan nauqas tirkeldi, bwl Qwrama Ştattağı qauipti virusqa şaldıqqandar sanın 12 adamğa jetkizdi.

AQŞ Ökilder palatası Sırtqı ister komitetiniñ Aziya-Tınıq mwhitı isteri jönindegi kişi komitet şaqırılğan otırısta sarapşılar Qıtaydağı virus jwqtırğandar jäne köz jwmğandar sanı Qıtay biligi körsetken mälimetten älde qayda köp boluı mümkin degen qorıtındığa keldi. Atalğan komitet Beyjiñniñ alğaşında AQŞ-tıñ aurulardı baqılau ortalıqtarı men densaulıq saqtau salasındağı basqa sarapşılardıñ kömegin qabıldaudan bas tartuı, keyin halıqaralıq aqparat qwraldarınıñ kümändi mälimetterinen keyin ğana AQŞ kömegin qabıl aluı sındı äreketterin alğa tarta otırıp, Beyjiñ naqtı jağdaydı jasırıp qaluğa tırısıp otır dep sanaydı.

«Keşiktirilgen aqparattar men bağalaular Qıtay biiliginiñ bedeline nwqsan keltirip qana qoymaydı, älem elderi tipti de köp adam ömirin joğaltuına äkelip soğadı, äri aurudıñ odan sayın taraluına jol beredi», – deydi atalğan komitet jetekşileri. Olar sonday-aq: «Virustıñ qauipti äri jwqpalı boluına qaramastan Qıtay ükimeti osığan deyin Halıqaralıq qauımdastıqpen tolıqtay ıntımaqtastıq jasasudan bas tartıp keldi. Bizdiñ oyımızşa, bwl jağday sayasattandırılmauı kerek, virus sayasattı da, şekaranı da bilmeydi», – deydi.

Qıtay SİM tarabı bwğan qatıstı eñ jaña mälimdemesinde barlıq taraptardı Qıtay ükimetiniñ epidemiyağa qarsı baqılau, tizgindeu amaldarınıñ nätijesin sabırlılıqpen jäne tınıştıqpen kütedi dep ümittenetinin jetkizdi. Aşalap aytqanda, Qıtay ükimeti barlıq şaralardı jasay aladı, basqalardıñ aralasuın qalamaydı demek. Qıtay SİM ökildi Hua Çüniñ Qıtaydıñ azamattıq aviaciyası toqtatılmaytının, şetelderde jürgen Qıtay azamattarı da elge qaytarılatının mälimdedi.

Qalay degen künde de, Qıtaydağı twtas el kölemindegi aldın alu, tizgindeu şaraları äskeri tüs alıp ketken, auıldar men auıldardı tipti jaqın körşiler de öz ara qarım-qatınastan şekteldi. Osıdan-aq, virus jağdayınıñ qanşalıqtı auır ekenin biluge boladı.

“The Qazaq Times ”