اقش وكىلدەر پالاتاسى: قىتاي بيلىگى ەلدەگى ىندەت جاعدايىن جاسىرىپ وتىر

قىتايدىڭ ۋحان قالاسىنان قاۋىپتى جاڭا ىندەت تاراعانىنا ەكى ايدان استام ۋاقىت وتكەندە اقش-تىڭ وكىلدەر پالاتاسى ۆيرۋسقا قاتىستى ماسەلەلەر بويىنشا العاشقى تالقى وتىرىسىن وتكىزدى. بىرقاتار زاڭ شىعارۋشىلار بەيجىڭ بيلىگى قىتايداعى ناقتى جاعدايدى جاسىرىپ وتىر دەپ كۇمانداناتىنىن ءبىلدىردى جانە دۇنيەجۇزىلىك دەنساۋلىق ساقتاۋ ۇيىمى ءوزىنىڭ سەنىمى مەن ءرولىن جوعالتىپ قويعانىن ايتتى.

جاڭا كوروناۆيرۋس قىتايدا قارقىندى تاراپ جاتقانى بەلگىلى. قازىر قاۋىپتى ۆيرۋس قىتايدىڭ بارلىق پروۆينتسيالارى مەن اۆتونوميالى ايماقتارىنا تاراپ ۇلگىرگەن. رەسمي مالىمەت بويىنشا، قازىرگە دەيىن 28 مىڭ ادام جۇقتىرىپ، 560-تان استام ادام كوز جۇمعان. سونداي-اق، الەمنىڭ 20-دان استام ەلىنە تارالدى. اقش-تىڭ ۆيسكونسين شتاتىندا سەيسەنبىدە جاڭا كوروناۆيرۋسقا شالدىققان ناۋقاس تىركەلدى، بۇل قۇراما شتاتتاعى قاۋىپتى ۆيرۋسقا شالدىققاندار سانىن 12 ادامعا جەتكىزدى.

اقش وكىلدەر پالاتاسى سىرتقى ىستەر كوميتەتىنىڭ ازيا-تىنىق مۇحيتى ىستەرى جونىندەگى كىشى كوميتەت شاقىرىلعان وتىرىستا ساراپشىلار قىتايداعى ۆيرۋس جۇقتىرعاندار جانە كوز جۇمعاندار سانى قىتاي بيلىگى كورسەتكەن مالىمەتتەن الدە قايدا كوپ بولۋى مۇمكىن دەگەن قورىتىندىعا كەلدى. اتالعان كوميتەت بەيجىڭنىڭ العاشىندا اقش-تىڭ اۋرۋلاردى باقىلاۋ ورتالىقتارى مەن دەنساۋلىق ساقتاۋ سالاسىنداعى باسقا ساراپشىلاردىڭ كومەگىن قابىلداۋدان باس تارتۋى، كەيىن حالىقارالىق اقپارات قۇرالدارىنىڭ كۇماندى مالىمەتتەرىنەن كەيىن عانا اقش كومەگىن قابىل الۋى سىندى ارەكەتتەرىن العا تارتا وتىرىپ، بەيجىڭ ناقتى جاعدايدى جاسىرىپ قالۋعا تىرىسىپ وتىر دەپ سانايدى.

«كەشىكتىرىلگەن اقپاراتتار مەن باعالاۋلار قىتاي بيىلىگىنىڭ بەدەلىنە نۇقسان كەلتىرىپ قانا قويمايدى، الەم ەلدەرى ءتىپتى دە كوپ ادام ءومىرىن جوعالتۋىنا اكەلىپ سوعادى، ءارى اۋرۋدىڭ ودان سايىن تارالۋىنا جول بەرەدى»، – دەيدى اتالعان كوميتەت جەتەكشىلەرى. ولار سونداي-اق: «ۆيرۋستىڭ قاۋىپتى ءارى جۇقپالى بولۋىنا قاراماستان قىتاي ۇكىمەتى وسىعان دەيىن حالىقارالىق قاۋىمداستىقپەن تولىقتاي ىنتىماقتاستىق جاساسۋدان باس تارتىپ كەلدى. ءبىزدىڭ ويىمىزشا، بۇل جاعداي ساياساتتاندىرىلماۋى كەرەك، ۆيرۋس ساياساتتى دا، شەكارانى دا بىلمەيدى»، – دەيدى.

قىتاي ءسىم تارابى بۇعان قاتىستى ەڭ جاڭا مالىمدەمەسىندە بارلىق تاراپتاردى قىتاي ۇكىمەتىنىڭ ەپيدەمياعا قارسى باقىلاۋ، تىزگىندەۋ امالدارىنىڭ ناتيجەسىن سابىرلىلىقپەن جانە تىنىشتىقپەن كۇتەدى دەپ ۇمىتتەنەتىنىن جەتكىزدى. اشالاپ ايتقاندا، قىتاي ۇكىمەتى بارلىق شارالاردى جاساي الادى، باسقالاردىڭ ارالاسۋىن قالامايدى دەمەك. قىتاي ءسىم وكىلدى حۋا ءچۇنيڭ قىتايدىڭ ازاماتتىق اۆياتسياسى توقتاتىلمايتىنىن، شەتەلدەردە جۇرگەن قىتاي ازاماتتارى دا ەلگە قايتارىلاتىنىن مالىمدەدى.

قالاي دەگەن كۇندە دە، قىتايداعى تۇتاس ەل كولەمىندەگى الدىن الۋ، تىزگىندەۋ شارالارى اسكەري ءتۇس الىپ كەتكەن، اۋىلدار مەن اۋىلداردى ءتىپتى جاقىن كورشىلەر دە ءوز ارا قارىم-قاتىناستان شەكتەلدى. وسىدان-اق، ۆيرۋس جاعدايىنىڭ قانشالىقتى اۋىر ەكەنىن بىلۋگە بولادى.

“The Qazaq Times ”