Belsendi Älibek Moldin. Foto: centralasian.or

29 qañtarda №3 Aqtöbe qalalıq sotı köp balalı bes ananıñ jergilikti belsendi Älibek Moldinniñ üstinen jazğan şağımı boyınşa azamattıq isti qaray bastadı. Bwl turalı Aqtöbe oblıstıq sotınıñ baspasöz qızmeti habarladı.

Köp balalı analar: Gülmira Bimağambetova, Sänimkül Süyinbaeva, Janar Qwlmambetova, Miua Bekbosınova men Ziba Otarbekova sotqa Moldinniñ üstinen «ar-namısımızdı taptadı» dep şağımdanğan. Äyelderdiñ ärqaysı sottan moral'dıq şığın retinde Moldinnen 100 mıñ teñgeden öndirip beruin swrağan. Şağımdanuşılar sonımen birge belsendiniñ köpşiliktiñ aldında analardan keşirim swrauın talap etip otır.

Osıdan jiırma kün bwrın 9 qañtarda Aqtöbe №2 qalalıq sotı "köp balalı analardı qorladı" dep ayıptalğan aqtöbelik belsendi Älibek Moldindi aqtap şıqqan bolatın. Sot ükimin oqığan sud'ya Temirjan Aldanov "Moldinniñ üstinen qozğalğan iste qılmıs qwramı tabılmadı" degen.

Moldin isi boyınşa ötken sot procesteriniñ birinde Aqtöbe oblısı äkimdiginiñ janında tüsirilgen video ayğaq körsetilgen edi. Videodan köp balalı äyelderdiñ äkimdikke jinalğanın köruge boladı. Narazı toppen Aqtöbe qalası äkiminiñ orınbasarı Aygül Arınğazieva söylesip twr. Sälden soñ narazı top Arınğazievanıñ soñınan ilesti. Osı kezde kadr sırtındağı er adamnıñ «mal bolıp ötesiñder, halıqtıñ tobır ekenin osıdan biluge boladı» degen dauısı estildi. Arızdanuşılar Gülmira Bimağambetova men Sänimkül Süyinbaeva «Bwl – Moldinniñ dauısı. Ol bizdi qorladı» deydi.

Sotqa jeke şağım tüsirgender - Sänimkül Süyinbaeva men Gülmira Bimağambetova sot ükimimen kelispeytinin aytqan. Artınşa azamattıq sotqa şağımdanğan.

Älibek Moldin özine tağılğan ayıptarmen kelispeydi. Ol "qılmıstıq isti öziniñ belsendiligimen" baylanıstırıp otır. Moldin sot bastalğanda özine qozğalğan isti "biliktiñ tapsırması" dep sanaytının aytqan. Äkimdik ökilderi mwnı joqqa şığarğan.

Belsendi Moldin 2016 jılğı jer mitingileri, 2019 jılı bilikten ädil saylau ötkizudi talap etken narazılıq şaralarına, Qazaqstandağı Qıtay jobalarına qarsı akciyalarğa qatısqan. Bıltır ol "beybit miting ötkizu zañın bwzdı" dep tört ret äkimşilik jauapqa tartılğan.

"The Qazaq Times"