Foto: kg.akipress.org

«Aziya N'yus» gazetiniñ bas redaktorı Aslanbek Sartbaev 15 qañtarda äskeri prokuraturada bes sağat boyı tergelip şıqqan. Bwl turalı Ortalıq Aziya jañalıqtar qızmeti jazdı.

Äskeri prokuratura mälimetinşe, Sartbaevtı eldiñ vice-prem'er-ministri Jeniş Razakovqa qatıstı sıni maqalağa baylanıstı şaqırğan.

Sartbaevtıñ özi Azattıqqa bergen swqbatında tergeuşiler 5 sağat boyı swraq qoyğanın ayttı. Biraq tergeu isiniñ qwpiyalığına baylanıstı qanday is boyınşa şaqırılğanın aytpadı. Jurnalist tek «Aziya N'yus» gazetinde jariyalanğan maqala boyınşa ekenin atap ötti.

«Swraqtar meniñ jurnalistik qızmetime baylanıstı boldı. Bes sağat boyı otıru men üşin moral'dıq jağınan jäne psihologiyalıq jağınan da qısım boldı», - dedi Sartbaev.

Vice-prem'er-ministr Jeniş Razakov osığan deyin «Aziya N'yus» gazetimen sottasqan. Ol öziniñ Täjikstan arnayı qızmetimen baylanısı bar degen maqala üşin 10 mln som ötemaqı talap etti. 2019 jıldıñ qaraşa ayında sot arız beruşiniñ talabın qabıldap, gazetke 1 mln som (14 mıñ dollar) ayıppwl salğan.

“The Qazaq Times”