Botanikalıq baqtıñ küzgi körinisi. Foto: aşıq derekköz

Orman şaruaşılığı jäne januarlar düniesi komitetiniñ baspasöz hatşısı Säken Dildahmet öziniñ facebook parağında Almatıdağı negizgi botanikalıq baq ekologiya, geologiya jäne tabiği resurstar ministrligine berilgenin habarladı.  

«Qazaqstan Respublikası Ükimetiniñ 2019 jılğı 20 jeltoqsandağı №951 Qaulısımen Qazaqstan Respublikasınıñ Bilim jäne ğılım ministrligi Ğılım komitetiniñ «Botanika jäne fitointrodukciya institutı (Bas botanikalıq baq)» Qazaqstan Respublikası Ekologiya, geologiya jäne tabiği resurstar ministrliginiñ Orman şaruaşılığı jäne januarlar düniesi komitetiniñ qaramağına berildi», – dep jazdı baspasöz ökili.

Osığan deyin botanikalıq baq bilim jäne ğılım ministrliginiñ qaramağında bolğan. Respublikalıq balanstağı nısan erekşe qorğalatın tabiği aumaqtar tiziminen şığarılmaytın boldı.

Bügingi tañda botanikalıq baqta batıs jäne soltüstik pavil'ondardıñ qwrılısı ayaqtaldı. Biıl qayta jöndeu jwmıstarı tolığımen ayaqtalmaq. Baq aumağında sirek kezdesetin mıñdağan ağaş-bwta men gül türleri otırğızılıp jatqan körinedi.

1932 jılı qwrılğan baq botanika jäne fitointrodukciya institutınıñ qwramındağı ğılımi-zertteu mekemesi ekeni belgili. Esentay jäne Ülken Almatı özenderiniñ aralığında orın tepken bas botanikalıq baqta jergilikti jäne basqa jerlerden äkelingen ösimdikterdiñ 5,5 mıñday türi men sortı (onıñ 100-ge juıq türi Qazaqstannıñ «Qızıl kitabına» engen) bar. Aumağı 104 ga qwraytın baqtıñ rekonstrukciyalıq jwmısın Qazaqstandağı eñ bay adamdardıñ biri Bolat Ötemwratovtıñ qayırımdılıq qorı jürgizip keledi.

 “The Qazaq Times”