Semey qalası. Foto: aşıq derekköz

Bügin mäjilis  «Aqjol» partiyasınıñ ökili, deputat Azat Peruaşev ükimet basşısına joldağan saualında Semey qalasına respublikalıq märtebe berudi wsındı.

Ol Alaş astanası atanğan tarihi şaharğa respublikalıq status berudi Abay Qwnanbaywlınıñ 175 jıldığı qarsañında mañızı zor şeşim boladı dep esepteydi.

«Osı orayda ker zamanda qazaqtıñ ruhın kötergen, qazaqtıñ dauısın jetkizgen Abay ruhınıñ ordası Semey qalasına da tiisti märtebesin beru orındı dep sanaymın. Äkimşilik-aumaqtıq qwrılıs turalı zañnıñ 3-babına säykes respublikalıq mañızı bar qalalar qatarına halqınıñ sanı 1 millionnan asatın eldi mekender nemese erekşe memlekettik mañızı bar qalalar jatadı. Bizdiñ oyımızşa, Semey qalası däl osı erekşe memlekettik mañızı bar qala. Sondıqtan oğan  respublikalıq märtebe beru jöninde memleket basşısına wsınıs engizu mümkindigin qarastıruıñızdı swraymın», – dedi deputat öz sözinde.

Bwğan deyin Semey qalasınıñ äuejayına qazaqtıñ wlı aqını Abay esimin beru turalı ötinim berilgen. Qazir qwjattı respublikalıq onomastika komissiyası qarap jatır. Alaşorda tarihında erekşe mäni bar köne şaharda bügingi tañda 340 mıñğa juıq azamat ömir süredi.

Semeydiñ körnekti nısandarınıñ biri - negizgi köpir. Foto: Wikipedia

"The Qazaq Times"