Foto: centralasian.org

12 jeltoqsanda el astanasında altı belsendi AQŞ elşiliginiñ aldına barıp, "Qıtayda qısımğa wşırağan etnikalıq qazaqtardıñ mäselesine köz jwma qarap otırğan" Qazaqstan biligin sınap, AQŞ-tan bilikpen kelisim jasaspay, sankciya saludı swradı. Bwl turalı Ortalıq Aziya jañalıqtar qızmeti jazdı.

Belsendiler bilikti Qıtaydağı etnikalıq qazaqtardıñ mäselesine nazar audarmaydı, elde adam qwqıqtarı saqtalmaydı dep ayıptadı.

Olar AQŞ memlekettik hatşısı, kongress ökilderi men Düniejüzilik bank basşılığı atına hat tapsırdı. Özderin "405 qozğalıs" wyımınıñ müşeleri dep tanıstırğan belsendiler Qazaqstan biligi adam qwqığın jüyeli türde bwzıp jatır, azaptauğa jol berip, Qıtay biligine etnikalıq qazaqtar men wyğırlardı quğındauına qoldau körsetip otır dep sanaytındıqtarın ayttı. Olar Qazaqstan video baqılau jürgizetin Hikvision digital technology jabdıqtarın sol maqsatta Qıtaydan satıp alıp otır dep sanaydı. Olar qoldarında "Şıñjañda qazaqtar bar!", "Adam qwqığın bwzğandarmen kelisim jasamau kerek, olarğa sankciya salu kerek" (qazaqşağa audarılğan) degen jazuı bar plakattar wstap twrdı.

- Sırtqı ister ministrimiz AQŞ-qa memlekettik hatşımen kezdesuge ketti. Biz Mayk Pompeonıñ ünimizdi estigenin, osı mäselelerdi ministr Mwhtar Tileuberdige qoyğanın, qwqığımızdıñ ne üşin bwzılıp jatqanın swrağanın qalaymız. Tileuberdi bwğan deyin Şıñjañdağı lager'lerde qazaqtar joq degen bolatın. Biz bwğan narazımız, bwl mäsele jabıq küyde qalıp otır, oğan riza emespiz, - dedi hattı oqığan Anya Şükeeva.

Belsendilerge dauıs küşeytkişi bar bir adam kelip, bwl akciyanıñ zañsız ekenin eskertti. Ol öziniñ jergilikti atqaru organnan kelgenin ayttı. Akciya ötkizip jatqandardı policiya qızmetkerleri sırttay baqılap twrdı.

Belsendiler elşilik ğimaratına kirip hat tapsırıp, odan keyin tarastı.

Degenmen akciya ayaqtalğannan keyin bir sağattan soñ belsendi Anya Şükeeva şarağa qatısqan Serik Jahin men Aybek esimdi belsendini policiyanıñ wstap, Almatı audandıq policiya bölimşesine alıp ketkenin habarladı. Bwl aqparattı Facebook jelisinde belsendi Dinara Mübarak ta rastap, policiya bölimşesi aldınan tikeley efir jürgizdi. Policiya ökilderi Azattıqqa wstalğandar turalı aqparat bermedi.

Bwdan bölek, Anya Şükeevanıñ aytuınşa, tağı bir belsendi Erbol Eshojin de Almatı audandıq policiya bölimşesine jetkizilgen.

Bwğan deyin ministr Mwhtar Tileuberdiniñ 12-13 jeltoqsanda resmi saparmen AQŞ-qa baratını, onda memlekettik hatşı AQŞ ükimeti men kongress ökilderimen jäne Düniejüzilik bank ökilderimen kezdesetini habarlanğan edi.

Astanalıq belsendiler tek soñğı bir aydıñ işinde onnan astam narazılıq akciyasın ötkizip, bilikti adam qwqıqtarın saqtauğa, sayasi twtqındardı bosatuğa şaqırğan. Olardıñ äreketiniñ barlığı "rwqsat etilmegen miting" dep tanılıp, keybir belsendiler 10-15 täulikke qamauğa alındı nemese 20-50 aylıq eseptik körsetkişte ayıppwl salındı.

"The Qazaq Times"