Jırau Järken Bödeş jas aqınnıñ kitabınıñ twsauın kesti. Foto: QT

Almatıda aqın Ädilet Ahmetwlınıñ "Ädilet" attı twñğış jır jinağınıñ twsauı kesilip, jır süyer oqırmanğa jol tarttı. Euraziya Ğılımi-zertteu institutında ötken twsaukeser şarasına qazaq poeziyasınıñ şoqtıqtı ökilderi Järken Bödeş, Ğalım Jaylıbay, Mwrat Şaymaran bastağan aqındar men Ahmet Baytwrsınov atındağı Til-bilim institutındağı ğalımdar men ğılımi qızmetkerler, ziyalı qauım ökilderi jäne jır süyer jastar qatıstı.

Aqın Ğalım Jaylıbay jas aqınğa sauğası men batasın berdi.

Şaranıñ bastalu sözinde Euraziya Ğılımi-zertteu institutınıñ direktorı Vakur Sümer mırza türki halıqtarındağı ortaq poetikalıq sarındar jäne "ädilet" wğımı turalı oyların ayta kelip, avtordıñ alğaşqı jiır jinağına sät sapar tiledi. Bwdan keyin kezegimen söz alğan aqındar men jazuşılar, etnograf ğalımdar jäne til mamandarı avtordıñ jaña eñbegi jayında, sonday-aq bügingi qazaq poeziyasınıñ betalısı jayında tolğamdı oy, tamaşa pikirlerdi ortağa saldı. Aytalıq, qazaqtıñ belgili aqını Ğalım Jaylıbay: "Astanadağı forumda qazaqtıñ ülken qalamgeri Dulat Isabekov modernizm degenniñ kez-kelgen önerdi halturağa bastaytının aytıp edi... Meniñ Ädiletke kelgeniñ öleñ degen – adamnıñ özi, jüregi, al qazaqtıñ aqını degen jusannıñ iisin, jılqınıñ dübirin sezine aluı kerek, qazaq degen halıqtı sezine aluı kerek, Ädilettiñ öleñinen men bwlardı köre alamın" – dedi.

Ağa buın aqındar Ädilet Ahmetwlınıñ "alğaşqı jır jinağına berilgen bağa men pikirlerdiñ bäri de qarız ekenin" ümit-tilekterdi öteu aldağı künniñ enşisinde ekenin aytıp, jır saparına aq batasın berdi.

Twsaukeser poeziyağa arnalğan talqığa wlastı.

Talqı-konferenciyasına wqsas poeziya turalı erkin talqılaular, pikir sayıstarmen ötken twsau keserde avtordıñ qwrbılas öner ökilderi ännen şaşu şaşsa, küyşi Arşın Käsimbaywlı jorıq küylerimen keş aybının asırdı. Şaranıñ soñı "Ädilet" jır jinağınıñ twsaukeserine arnalğan saltanattı dastarhanğa wlastı. Ayta keteyik, "Ädilet" jır jinağınıñ şığuına avtordıñ aynalasındağı dos-jarandarı demeuşilik etip,  "Otandastar"  qorı tikeley qoldau körsetken.

“The Qazaq Times”