Bir kün bwrın SpaceX kompaniyasınıñ jetekşisi, amerikalıq bay käsipker äri önertapqış Ilon Mask bir jıldan keyin Starship attı älemkemesin wşıruğa dayın ekenin mälimdedi.

Tehas ştatında atalğan kemeniñ sınaq nwsqası körsetildi. Ilon Masktıñ aytuınşa aldağı aylarda birneşe ret sınaq retinde wşırıp köredi. Aldımen jerden 20 şaqırım biiktikke deyin wşu sınağı ötedi, sätti bolsa tömen orbitağa deyin wşırıladı. Wzındığı 50 metr, diametri 9 metr bolatın keme 150 tonnağa deyin jük kötere aladı.

Ilon Mask öziniñ bastı maqsatı adamzattı basqa ğalamşarğa köşiru ekenin talay märte aytıp keledi. Ol bwğan deyin Starship sekildi kemelermen mıñdağan adam Marsqa wşıp, onda adamzat jasauğa layıq mekender qwratının, aldımen keme turisterdi alıp Ayğa wşatının da aytıp kelgen. Biraq, onıñ bwl jobasın sınauşılar köp bolğan. Tipti, birqatar sınşılar onıñ bwl jobası jüzege aspaytın qiyal-ğajayıp ertegiler qatarında körgen.

Osığan deyin eñ negizgi tapsırıs beruşisi NASA SpaceX kompaniyasınan Crew Dragon kemesin bitirip berudi swradı. Bwl keme Halıqaralıq ğarış stanciyasına wşuı kerek bolğan. Biraq, tehnikalıq sebepterge baylanıstı birneşe ret keşiktirildi. Osığan baylanıstı NASA men SpaceX kompaniyası arasında pikir alauızdığı da tuıp otır.

Biraq, Ilon Mask NASA-nıñ narazı pikirlerine jauap berip, Starship kemesin kompaniyanıñ tek 5 payız qızmetkerleri ğana jasap jatqanın, basım köp qızmetkerleri Falcon jäne Dragon jobalarımen aynalısıp otırğanın jetkizdi.

Qaltalı önertapqış öz kompaniyasınıñ Marstı igeru turalı jobasın basa aytıp keledi. Bıltır ğana Falcon Heavy zımıranı sätti sınaqtan ötti. Osılayşa Ilon Masktıñ kompaniyası ğarış salasında tabıstı nätije körsetken alğaşqı jekelik kompaniya qatarında tarihta qaldı. Alayda, älem elderinde ğarış salasın damıtu, özge ğalamşarlardan tirşilikke qolaylı orta izdeu ürdisi artqan sayın, bılayğı jwrttıñ kökeyinde bir küdik oyanıp keledi.

“The Qazaq Times”