Qauipsizdik keñestiñ keşegi otırısı. Foto: Reyter.

AQŞ uaqıtımen seysenbide BWW Qauipsizdik keñesi BWW-nıñ Auğanstanğa kömek beru missiyasın wzartu turalı qaulığa dauıs beredi. Qaulığa dauıs beru 16 qırküyekke belgilengen. Alayda, Qıtaydıñ «Bir beldeu, bir jol» bağdarlamasın alıp tastau nemese qatıstıru mäselesine baylanıstı bir kün keyinge şegerilgen.

«Reyter» agenttigi düysenbide birqatar diplomattardıñ mälimetine silteme jasap, atalğna mäsele boyınşa AQŞ pen Qıtay arasında qayşılıq orın alıp jatqanın habarlağan. Qıtay tarabı öz bağdarlamasınıñ Auğanstanğa kömek beru missiyasında atalmağanı üşin missiyanı wzartu qaulısına veto qoyğalı otır.

Qıtay bwğan deyin Germaniya men Indoneziya dayındağan missiyanıñ qaulısında «Bir beldeu, bir jol» turalı aytılmağanına narazılıq tanıtıp, keyin balama bağdarlama jazğan. Alayda, Qıtay dayındağan bwl jobağa Qauipsizdik keñestiñ keybir müşeleri qalıs. AQŞ-tıñ şığıs uaqıtımen seysenbi tüsten keyin dauıs berilui kerek bolğan qaulınıñ nätijesi turalı äli de anıq emes.

BWW-nıñ Auğanstandağı kömek missiyası 2002 jılı qwrılğan, qazir bwl jwmıs tobı 28 qırküyekte ötetin Auğanstandağı prezidenttik saylauğa kömek körsetude. Sonday-aq, Auğanstan ükimeti men Taliban arasındağı beybit kelissözderge ıqpal etuge tırısadı.

BWW Qauipsizdik Keñesi Auğanstanğa kömek tobınıñ mandatın jıl sayın wzartadı. Biıl naurız ayında Auğanstanğa kömek körsetu missiyasınıñ jobasınan AQŞ pen Qıtay arasında dau tudırıp kelgen «Bir beldeu, bir jol» bağdarlamasın alıp tastau turalı talqılanğan. Alayda, QK twraqtı müşesi bolğan Qıtay bwğan qarsı boldı.

2016, 2017 jäne 2018 jıldarğa arnalğan qararlarda sauda men tranzitti jeñildetu jönindegi Qıtaydıñ «Bir beldeu, bir jol» bastamasın ilgeriletu jäne alğa jıljıtu jönindegi barlıq äreketter körsetilgen. BWW-nıñ Auğanstandağı qızmetin wzartu jönindegi jaña zañdı qabıldau üşin kem degende toğız dauıs maqwldauı jäne Qauipsizdik keñestiñ 5 twraqtı müşesi (AQŞ, Resey, Qıtay, Franciya jäne Britaniya) tolıq dauıs berui kerek.

Qıtay atalğan bağdarlamasınıñ ıqpal kölemin keñeytu maqsatında Ortalıq jäne Oñtüstik Aziyanı qamtığan barlıq halıqaralıq bağdarlamalarğa kiriktirude. Qıtay Sırtqı ister tarabı Auğanstanğa kömek missiyasınıñ jalğasuın qoldaytının bildirdi. Alayda, Qıtay bağdarlamasınıñ qabıldanbauına oray missiyanı wzartuğa veto qoyu atalğan missiyanıñ jalğasuına kedergi keltirui de mümkin.

“The Qazaq Times”