Bügin, 30 tamız Qazaqstan Respublikasınıñ prezidenti Qasım-Jomart Toqaev qazaqstandıqtardı Konstituciya künimen qwttıqtadı. Biıl QR Atazañınıñ qabıldanğanına 24 jıl toldı.

Konstituciya memlekettik qwrılıstıñ qwqıqtıq negizin qalıptastıruşı qwjat bolıp tabıladı. Ol memlekettilik tetik, qoğamdıq, sayasi instituttar retinde qızmettiñ negizi bolarlıq principterin ornıqtıradı, adam men azamattıñ konstituciyalıq märtebesin belgileydi, ekonomikalıq qwrılıstıñ negizderin ayqındaydı. Ekinşi ret qabıldanğan qwjat 9 taraudan, 98 baptan twradı. Memleket basşısı Q.Toqaevtıñ qwttıqtau mätini:

"Qwrmetti otandastar!

Barşañızdı Qazaqstan Respublikasınıñ Konstituciyası künimen qwttıqtaymın!

 

Halqımızdıñ zañ üstemdigine, adamdardıñ negizgi qwqıqtarı men bostandıqtarın qamtamasız etuge wmtılısı töl tarihımızda ayqın körinis tapqan.

 

Ozıq älemdik täjiribeni, tarihi jäne wlttıq dästürlerdi arqau etken Qazaqstan Konstituciyası halqımızdıñ birligi men memleket täuelsizdiginiñ berik negizi sanaladı.

 

Kelesi jılı Ata zañımızdıñ 25 jıldığın atap ötemiz. Osı kezeñ işinde elimizdiñ bastı zañı jasampazdıq pen ilgerileudiñ kepiline aynaldı.

 

Qazaqstan twtas qwqıqtıq jäne äleumettik-ekonomikalıq jüyeni qalıptastırıp, jan-jaqtı jañğıru jolına tüsti. Twñğış Prezidentimiz – Elbası Nwrswltan Äbişwlı Nazarbaev wsınğan Wlt josparı men institucionaldıq reformalar sonıñ negizin qwraydı.

 

Bizdiñ maqsatımız – ekonomikanıñ sapalı ösimin jäne halıqtıñ äleumettik swranıstarın qamtamasız etip, twrmıs deñgeyin arttıru, sonday-aq memlekettiñ sayasi jüyesin jetildiru.  

 

Ata zañ azamattarımızdıñ müddesine qızmet etip, elimizdi odan äri damıtuğa septigin tigize beredi.

 

Barlıq qazaqstandıqtarğa zor densaulıq, baq-bereke jäne tolağay tabıs tileymin!"

Esteriñizge sala ketsek, QR Konstituciyasında negiz qalauşı qağidattar retinde qoğamdıq kelisim, sayasi twraqtılıq, ekonomikalıq damu jäne memlekettik ömirdiñ barınşa mañızdı mäselelerin demokratiyalıq ädistermen şeşu naqtı belgilengen.

"The Qazaq Times"