بۇگىن، 30 تامىز قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ قازاقستاندىقتاردى كونستيتۋتسيا كۇنىمەن قۇتتىقتادى. بيىل قر اتازاڭىنىڭ قابىلدانعانىنا 24 جىل تولدى.

كونستيتۋتسيا مەملەكەتتىك قۇرىلىستىڭ قۇقىقتىق نەگىزىن قالىپتاستىرۋشى قۇجات بولىپ تابىلادى. ول مەملەكەتتىلىك تەتىك، قوعامدىق، ساياسي ينستيتۋتتار رەتىندە قىزمەتتىڭ نەگىزى بولارلىق پرينتسيپتەرىن ورنىقتىرادى، ادام مەن ازاماتتىڭ كونستيتۋتسيالىق مارتەبەسىن بەلگىلەيدى، ەكونوميكالىق قۇرىلىستىڭ نەگىزدەرىن ايقىندايدى. ەكىنشى رەت قابىلدانعان قۇجات 9 تاراۋدان، 98 باپتان تۇرادى. مەملەكەت باسشىسى ق.توقاەۆتىڭ قۇتتىقتاۋ ءماتىنى:

"قۇرمەتتى وتانداستار!

بارشاڭىزدى قازاقستان رەسپۋبليكاسىنىڭ كونستيتۋتسياسى كۇنىمەن قۇتتىقتايمىن!

 

حالقىمىزدىڭ زاڭ ۇستەمدىگىنە، ادامداردىڭ نەگىزگى قۇقىقتارى مەن بوستاندىقتارىن قامتاماسىز ەتۋگە ۇمتىلىسى ءتول تاريحىمىزدا ايقىن كورىنىس تاپقان.

 

وزىق الەمدىك تاجىريبەنى، تاريحي جانە ۇلتتىق داستۇرلەردى ارقاۋ ەتكەن قازاقستان كونستيتۋتسياسى حالقىمىزدىڭ بىرلىگى مەن مەملەكەت تاۋەلسىزدىگىنىڭ بەرىك نەگىزى سانالادى.

 

كەلەسى جىلى اتا زاڭىمىزدىڭ 25 جىلدىعىن اتاپ وتەمىز. وسى كەزەڭ ىشىندە ەلىمىزدىڭ باستى زاڭى جاسامپازدىق پەن ىلگەرىلەۋدىڭ كەپىلىنە اينالدى.

 

قازاقستان تۇتاس قۇقىقتىق جانە الەۋمەتتىك-ەكونوميكالىق جۇيەنى قالىپتاستىرىپ، جان-جاقتى جاڭعىرۋ جولىنا ءتۇستى. تۇڭعىش پرەزيدەنتىمىز – ەلباسى نۇرسۇلتان ءابىشۇلى نازارباەۆ ۇسىنعان ۇلت جوسپارى مەن ينستيتۋتسيونالدىق رەفورمالار سونىڭ نەگىزىن قۇرايدى.

 

ءبىزدىڭ ماقساتىمىز – ەكونوميكانىڭ ساپالى ءوسىمىن جانە حالىقتىڭ الەۋمەتتىك سۇرانىستارىن قامتاماسىز ەتىپ، تۇرمىس دەڭگەيىن ارتتىرۋ، سونداي-اق مەملەكەتتىڭ ساياسي جۇيەسىن جەتىلدىرۋ.  

 

اتا زاڭ ازاماتتارىمىزدىڭ مۇددەسىنە قىزمەت ەتىپ، ەلىمىزدى ودان ءارى دامىتۋعا سەپتىگىن تيگىزە بەرەدى.

 

بارلىق قازاقستاندىقتارعا زور دەنساۋلىق، باق-بەرەكە جانە تولاعاي تابىس تىلەيمىن!"

ەستەرىڭىزگە سالا كەتسەك، قر كونستيتۋتسياسىندا نەگىز قالاۋشى قاعيداتتار رەتىندە قوعامدىق كەلىسىم، ساياسي تۇراقتىلىق، ەكونوميكالىق دامۋ جانە مەملەكەتتىك ءومىردىڭ بارىنشا ماڭىزدى ماسەلەلەرىن دەموكراتيالىق ادىستەرمەن شەشۋ ناقتى بەلگىلەنگەن.

"The Qazaq Times"