Almatı oblısı Talğar audanı Besağaş auılınıñ twrğındarı bügin tañnan beri Almatı-Talğar tasjolınıñ boyında jinalıp twr. Olar bwğan deyin de, yağni 1 şilde de narazılıq şarasın ötkizgen. Besağaştıqtardıñ joldı jabu arqılı narazılıq bildiruine bir ğana sebep bar, «Jaz kelisimen Besağaşta auız su mäselesi tuındaydı», – deydi Jılbek Sembekwlı. Onıñ aytuınşa, Besağaştağı auız su mäselesi tek biıl ğana emes, birneşe jıldan beri qordalanıp keledi. «Mäsele negizinen jaz aylarında bastaladı. Jaz kelisimen sudı öşire bastaydı. Nege? Mına jerde «Tas-qwm Aqsay-sau» degen JŞS-ğa qaraydı. Sol kompaniyanıñ qarızdarına baylanıstı su öşiriledi. Biz su äkimdiktiñ balanısına ötse degen ötinişimiz bar», – deydi Jılbek Sembekwlı. Auıl men audan äkimderiniñ orınbasarları bastağan birqatar äkimdik ökilderine qanağattanbadı. Birdan, Talğan audanınıñ äkiminiñ keluin talap etti. Äkim kelgenşe auıl twrğındarı Almatı-Talğar tas jolın birneşe minutqa jauıp tastadı. Arağa az uaqıt salıp Talğar audanınıñ äkimi Rıskeldi Ahmetqaliwlı Satbaev ta jwrt aldına kelip, 1 şildedegi uädesin qaytaladı. Talğar äkimi jwrtpen birge su qoymasına da bardı. Qalay bolğanda da, äkimdik tarabı atalğan JŞS-dan öz balanısına almay, Besağaştıñ auız su mäselesin şeşim tappaytınday. Jazdıñ aptap ıstığı endi ğana bastalıp jatqanın eskerse, Talğar äkimi öz uädesin orındaydı degen ümittemiz.

“The Qazaq Times”