Reseylik S-400 qorğanıs jüyesi Türkiyağa jetkizile bastadı

Resey öndiretin S-400 zımıran qorğanıs jüyesi Türkiyağa jetkizile bastadı. Äue qorğanıs jüyesiniñ alğaşqıları bir kün bwrın Ankaradağı «Mürted» äue bazasına jetkizildi.

Türkiya Qorğanıs ministrliginiñ habarlauınşa, 12 şilde küni S-400 äue qorğanıs jüyesiniñ qwrılğılarınıñ alğaşqıları türik jerine jetkizildi. Bwlarğa qosa reseylik mamandar men jwmıs tobı da Türkiyağa barıp, qorğanıs jüyesin ornatu jwmıstarına qolğabıs etedi jäne alğaşqı sınaq procesterinen ötkizedi.

Türkiya men Resey arasında S-400 äue qorğanıs jüyesin satıp alu jäne satıp beru turalı kelisimge 2017 jılı 11 säuir küni qol qoyğan bolatın. Ankara, reseylik qorğanıs qwrılğısın satıp alu turalı şeşimin jariya etkennen tartıp, NATO jäne AQŞ-Türkiya arasında talas-tartıs tuılğan. Sodan beri AQŞ pen Türkiya arasında kirbeñdik äli jazılğan joq.

Türkiya SİM basşısı Mevlüt Şavuşoğlu bwl turalı mälimdemesinde: «Kelisim boyınşa qabıldau procesi bastaldı. Jalpı process kelisim boyınşa toqtausız jalğasadı», – dedi.

AQŞ Türkiyanı Resey tehnikasın satıp alu nietinen qaytaru üşin birqatar şaralarğa barıp kördi. Biraq, bwl mäselede Ankara alğan betinen qaytpadı dese de boladı. Endigi mäsele – Anadolı jwrtında qwrığan Resey qorğanıs tehnikası men AQŞ jäne NATO küşteri arasındağı boluı mümkin kikiljiñder. AQŞ bwğan deyin reseylik qorğanıs jüyesi NATO paydalanatın europalıq jäne amerikalıq äskeri tehnikalarğa kedergi keltiredi dep kelgen edi. Demek, S-400 jüyesiniñ Türkiyağa ornalasa saluımen AQŞ-Türkiya arasındağı dau-damay ayaqtalmaytını anıq.

“The Qazaq Times”